ယူကရိန်းတပ်ဖွဲ့တွေဟာ ရုရှားကို တန်ပြန်ထိုးစစ်ရဲ့ တစိတ်တပိုင်းအနေနဲ့ ခါကိဗ်ဒေသက နယ်မြေ ၃၀ ကျော်ကို လွတ်မြောက်အောင် လုပ်ပေးနိုင်ခဲ့ကြောင်း သမ္မတ ဇလန်းစကီးက စက်တင်ဘာ ၉ ရက်မှာ ပြောကြားခဲ့ပါတယ်။ 

ကိယက်ဗ်ရဲ့တပ်ဖွဲ့တွေဟာ နယ်ပယ်များစွာမှာ တက်ကြွတဲ့ စစ်ဆင်ရေးတွေကို အောင်အောင် မြင်မြင် ဆက်လက်ဆင်နွှဲနေကြောင်းလည်း ဗွီဒီယိုမိန့်ခွန်းထဲမှာ ပြောထားပါတယ်။

ယူကရိန်းတပ်ဖွဲ့တွေဟာ အရှေ့ဘက်မှာ မြန်မြန်ဆန်ဆန် ထိုးဖောက် ချဉ်းကပ်ပြီးတော့ အရင်ရုရှားတို့ နယ်မြေချဲ့ထွင် ထိန်းချုပ်ထားတဲ့ ဧရိယာတွေကို သိမ်းပိုက်ခဲ့ကြောင်း ရုရှားနိုင်ငံမှ ခန့်အပ်ထားတဲ့ ဒေသဆိုင်ရာ အရာရှိတဦးက စက်တင်ဘာ ၉ ရက်မှာ ပြောကြားခဲ့ပြီး စစ်ပွဲအတွင်း အချိုးအကွေ့တခုကို အမှတ်အသားပြုနိုင်တဲ့ အောင်မြင်မှုတခုလို့ ဆိုပါတယ်။ 

ရုရှားကလည်း သူ့ရဲ့ရှေ့တန်းတပ်ဖွဲ့ တစိတ်တပိုင်းဟာ ယူကရိန်းရဲ့ ဒုတိယအကြီးဆုံးမြို့ ခါကိဗ်ရဲ့ အရှေ့တောင်ဘက်မှာ ပြိုပျက်ခဲ့ကြောင်း အသိအမှတ်ပြုခဲ့ပါတယ်။ 

ရုရှားရဲ့ နယ်စပ်ဖြတ်ကျော် ပစ်ခတ်ခဲ့မှုကြောင့် စက်တင်ဘာ ၉ ရက် မနက်ပိုင်းက အရှေ့မြောက်ပိုင်း Sumy ဒေသရှိ ဆေးရုံတရုံ ထိမှန်ပျက်စီးခဲ့ပြီး အရပ်သားတွေ ဒဏ်ရာရရှိခဲ့ကြောင်း ယူကရိန်းအရာရှိတွေက ပြောပါတယ်။ ရုရှားကတော့ အရပ်သားတွေကို ပစ်မှတ်ထားတယ် ဆိုတာကို ငြင်းဆိုထားပါတယ်။