လာမယ့်အပတ် နယူးယောက်က ကမ္ဘာ့ခေါင်းဆောင်တွေရဲ့ နှစ်ပတ်လည်အစည်းအဝေးမှာ အမေရိကန်အရာရှိတွေအနေနဲ့ ရုရှားအရာရှိတွေကို တွေ့ဆုံဖို့ အစီအစဉ်မရှိဘူးလို့ ကုလသမဂ္ဂဆိုင်ရာ အမေရိကန် သံအမတ်ကြီး လင်ဒါ သောမတ်စ်-ဂရင်းဖှီးလ်ဒ် က စက်တင်ဘာ ၁၆ ရက်မှာ ပြောကြားခဲ့ပါတယ်။ 

ရုရှားကို ယူကရိန်းက အနိုင်ရစေချင်ပြီး ဒေါ်လာဘီလီယံနဲ့ချီတဲ့ လက်နက်တွေ ယူကရိန်းကို ထောက်ပံ့ပေးထားပေမယ့် အမေရိကန်စစ်သားတွေနဲ့ ရုရှားစစ်သားတွေကြား တိုက်ရိုက် ထိပ်တိုက် တွေ့မှုမျိုး မဖြစ်စေချင်ဘူးလို့ အမေရိကန် သမ္မတ ဂျိုးဘိုင်ဒန်က ပြောကြားထားပါတယ်။ 

ဘိုင်ဒန်ဟာ စက်တင်ဘာ ၂၁ ရက်မှာ ပြုလုပ်မယ့် အထွေထွေညီလာခံမှာ မိန့်ခွန်းပြောကြားဖို့ စီစဉ်ထားတယ်လို့ သူက ပြောပါတယ်။ 

နောက်တပတ်မှာ ယူကရိန်းအကြောင်း ဆွေးနွေးစရာတွေ အများကြီးရှိပေမယ့် ယူကရိန်းအရေး တခုတည်း မဟုတ်ပဲ ရာသီဥတုပြောင်းလဲမှုရဲ့ သက်ရောက်မှု၊ ကပ်ရောဂါရဲ့သက်ရောက်မှု၊ ကမ္ဘာ့တခြားနေရာတွေမှာ ဖြစ်နေတဲ့ ပဋိပက္ခတွေ၊ အဲဒီပြဿနာတွေအားလုံးကို ဆွေးနွေးသွားမှာပါ လို့ ဆိုပါတယ်။ 

အီရန်နျူကလီးယား သဘောတူညီချက်နဲ့ ပတ်သက်လို့ တွေ့ဆုံမှုတွေ ရှိမှာမဟုတ်ဘူးလို့ သောမတ်စ်-ဂရင်းဖှီးလ်ဒ်က သတင်းထောက်တွေကို ပြောပါတယ်။ 

၂၀၁၅ သဘောတူညီချက်ကို ပြန်အသက်သွင်းဖို့ ဗီယင်နာမှာ ဆွေးနွေးမှုတွေ လုပ်နေပေမယ့် မကြာမီကာလအတွင်းမှာ သဘောတူညီချက်ရဖို့ မဖြစ်နိုင်ဘူးလို့ အမေရိကန်အရာရှိတွေက အသိအမှတ်ပြုထားပါတယ်။