အမေရိကန်ဒုသမ္မတ ကမ်မလာ ဟားရစ်ဟာ တောင်ကိုရီးယားသမ္မတ ယွန်းဆွတ်ခ်ယိုးနဲ့ စက်တင်ဘာ ၂၉ ရက်က ဆိုးလ်မြို့မှာ တွေ့ဆုံခဲ့ပြီး ၂ နိုင်ငံကြား မဟာမိတ်ဖွဲ့ရေး ကတိကဝတ်ကို နှစ်ဖက်စလုံးက ထပ်လောင်းပြောကြားခဲ့ပါတယ်။

ဟားရစ်ဟာ မြောက်ကိုရီးယားက ဒုံးကျည်စမ်းသပ်ပစ်လွှတ်ပြီး နာရီပိုင်းအကြာမှာပဲ တောင်ကိုရီးယားမြို့တော်ကို ကြာသပတေးနေ့မှာ ရောက်ရှိလာခဲ့တာပါ။

ဟားရစ်က ကိုရီးယားကျွန်းဆွယ်နဲ့ အင်ဒို-ပစိဖိတ်ဒေသမှာ လုံခြုံရေးနဲ့ သာယာဝပြောရေးအတွက် အဓိကအရေးကြီးဆုံး ဝင်ရိုးတံဖြစ်ကြောင်း သူ့ရဲ့မဟာမိတ် တောင်ကိုရီးယားကို အမွှမ်းတင် ပြောကြားခဲ့ပါတယ်။

သမ္မတ ယွန်းက မဟာမိတ်ဖွဲ့မှုကို မြှင့်တင်မယ်လို့ ကတိပြုခဲ့ပြီး ပြီးခဲ့တဲ့မေလက အမေရိကန်သမ္မတ ဂျိုးဘိုင်ဒင်ရဲ့ ခရီးစဉ်အပြီး ဟားရစ်ရဲ့ခရီးစဉ်ဟာ အဲဒီရည်မှန်းချက်ကို အကောင်အထည်ဖော်ဖို့ နောက်ထပ်အလှည့်အပြောင်းတခု ဖြစ်လာလိမ့်မယ်လို့ ပြောကြားခဲ့ပါတယ်။

အမေရိကန်ဒုသမ္မတ ကမ်မလာ ဟားရစ်ဟာ စက်တင်ဘာ ၂၉ ရက်နေ့မှာပဲ တောင်နဲ့ မြောက်ကိုရီးယား ၂ နိုင်ငံကို ပိုင်းခြားထားတဲ့ စစ်မဲ့ဇုန် (DMZ) ကို ပထမဆုံးအကြိမ် သွားရောက်ခဲ့ပါတယ်။

ဒါဟာ တောင်ကိုရီးယားအပေါ် အမေရိကန် လုံခြုံရေးကတိကဝတ်တွေ မယိမ်းယိုင်ကြောင်း ပြသဖို့ ရည်ရွယ်တာဖြစ်ကြောင်း လက်ထောက်တွေက ပြောကြားခဲ့ပါတယ်။

ဟားရစ်ဟာ မြောက်ကိုရီးယားပိုင်နက်ကို မှန်ပြောင်းနဲ့ လှမ်းကြည့်ခဲ့ပြီး သူနဲ့အတူ လိုက်ပါလာတဲ့ စစ်သားတွေက ရှင်းပြခဲ့ကြပါတယ်။အစောပိုင်းက ဆိုးလ်မှာ တောင်ကိုရီးယားသမ္မတ  ယွန်းဆွတ်ခ်ယိုးနဲ့ တွေ့ဆုံဆွေးနွေးချိန်က မြောက်ကိုရီးယားရဲ့ အရှိန်မြှင့်လာတဲ့ နျူကလီးယား စကားလုံးအကြမ်းတွေနဲ့  လက်နက်စမ်းသပ်မှုကို ဟားရစ်က ရှုတ်ချခဲ့ကြောင်း အိမ်ဖြူတော်က ပြောကြားခဲ့ပါတယ်။