အာဆင်နယ်နဲ့ ဒါဘီပွဲစဉ်မှာ အနီကတ်ပြစ်ဒဏ်က ပွဲကို အဆုံးသတ်စေခဲ့ကြောင်း စပါးနည်းပြကွန်တီက ပြောသွားပါတယ်။

အာဆင်နယ်အသင်းက ၂ ဂိုး ၁ ဂိုးနဲ့ ဦးဆောင်နေချိန် ပွဲချိန် ၆၂ မိနစ်မှာ စပါးနောက်ခံလူ အီမာဆန်က မာတင်နယ်လီကို ဖျက်ထုတ်ပုံကြမ်းခဲ့လို့ တိုက်ရိုက်အနီကတ်ပြပြီး အထုတ်ခံခဲ့ရ တာပါ။

အဲဒီအနီကတ်ပြစ်ဒဏ်က ပွဲကိုအဆုံးသတ်စေခဲ့ပြီး ကစားသမားတွေအနေနဲ့လည်း အမှားအယွင်းတွေ များခဲ့တယ်လို့ နည်းပြကွန်တီကပြောပါတယ်။ 

“နောက်ဆုံးပေးပို့မှုတွေတင်မဟုတ်ဘဲ လွယ်ကူတဲ့ပေးပို့မှုတွေမှာတောင် အမှားတွေလုပ်ခဲ့တယ်။ အာဆင်နယ်ရဲ့ ဒုတိယဂိုးမှာဆိုရင်လည်း ကျနော်တို့ ပိုကောင်းတဲ့ကာကွယ်မှုမျိုးဖြစ်သင့်တယ်။ အနီကတ်ကတော့ပွဲကိုအဆုံးသတ်သွားစေတယ်။ ဒါကကျနော်တို့အတွက်ခက်ခဲပါတယ်”လို့ ကွန်တီကပြောပါတယ်။

နိုင်ငံတကာ ပွဲစဉ်တွေအပြီးမှာ ပြင်ဆင်ချိန်သိပ်မရခဲ့တာကလည်း အခက်အခဲရှိကြောင်း၊ လာမယ့် ပွဲစဉ်တွေမှာ အမှတ်ပေးဇယားထိပ်နားကအသင်းတွေကို လိုက်မီဖို့ ကြိုးပမ်းသွားရမှာဖြစ်ကြောင်း အာဆင်နယ်နဲ့ပွဲအပြီးမှာ နည်းပြကွန်တီကပြောသွားပါတယ်။