အမေရိကန်ကန်ပြည်ထောင်စုမှာ ပြီးခဲ့တဲ့ရက်ပိုင်းက တိုက်ခတ်သွားတဲ့ Ian အမည်ရှိ ဟာရီကိန်းမုန်တိုင်းကြောင့် ဖလော်ရီဒါပြည်နယ်က   ၂၇ ဦးအပါအဝင် အနည်းဆုံး လူအယောက် ၃၀ လောက်  သေဆုံးသွားတယ်လို့ အာဏာပိုင်တွေက အတည်ပြုပါတယ်။   

သက်ကြီးလင်မယားနှစ်ယောက်ကတော့ မီးပြတ်နေချိန် အောက်စီဂျင်ပြတ်ပြီး သေဆုံးခဲ့တယ်လို့ အာဏာပိုင်က ပြောပါတယ်။

ဟာရီကိန်းမုန်တိုင်းကြောင့် ပျက်စီးဆုံးရှုံးမှုတန်ဖိုး အမေရိကန်ဒေါ်လာ  ဘီလီယံ ၁၀၀ ကျော်လောက်ရှိနိုင်တယ်လို့   Karen Clark & Co ကုမ္ပဏီက ခန့်မှန်းတွက်ချက်ထားပါတယ်။ 

ဟာရီကိန်း Ian ကြောင့် ဖလော်ရီဒါမှာ မုန်တိုင်း တိုက်ခတ်ပြီး ၁ ရက်အကြာမှာ ပြည်နယ်အတွင်းရှိ နေအိမ်တွေနဲ့ စီးပွားရေးလုပ်ငန်းပေါင်း ၂ သန်းကျော် လျှပ်စစ်မီး ပြတ်တောက်ခဲ့ကြောင်း ဖလော်ရီဒါတာဝန်ရှိသူတွေက စက်တင်ဘာ ၃၀ ရက်မှာ ပြောပါတယ်။ 

ဟာရီကိန်း Ian ဟာ ဖလော်ရီဒါတလျှောက် ရေကြီးရေလျှံမှုတွေ၊ ဓာတ်အားလိုင်းတွေ ပြတ်တောက်၊ နေရာအနှံ့ ပျက်စီးမှုတွေ ချန်ထားခဲ့ပြီးနောက် မုန်တိုင်း ပြန်လည်အားကောင်း လာပြီး ကာရိုလိုင်းနားပြည်နယ်ကို ဦးတည် ရွေ့လျားသွားတာကြောင့် ပြည်နယ်ပင်လယ်ကွေ့ ကမ်းရိုးတန်းတလျှောက် ပိတ်မိနေသူတွေဆီ ရောက်ရှိအောင် အရေးပေါ် တပ်ဖွဲ့ဝင်တွေ ကြိုးပမ်းနေကြပါတယ်။ 

ဟာရီကိန်း Ian ဟာ  စက်တင်ဘာ ၂၈ နဲ့ ၂၉ ရက်တွေမှာ ပြည်နယ်ကို ဖြတ်ကျော်ဝင်ရောက်ပြီးနောက် ၃၀ ရက်မှာ ဖလော်ရီဒါရှိ အိမ်တွေနဲ့ စီးပွားရေးလုပ်ငန်းပေါင်း ၂ သန်းကျော်ဟာ လျှပ်စစ်မီးပြတ်တောက်နေဆဲပါ။ 

အမေရိကန်သမ္မတ ဂျိုးဘိုင်ဒန်ကကလည်း  ဖလော်ရီဒါသမိုင်းမှာ Ian ဟာရီကိန်းမုန်တိုင်းဟာ အသေအပျောက်အများဆုံး မုန်တိုင်းဖြစ်ကြောင်း စက်တင်ဘာ ၂၉ ရက်မှာ ပြောပါတယ်။