‌ကန့်ဘလူမြို့နယ် အရှေ့မြောက်ပိုင်းမှာ အင်အား ၈၀ ပါ စစ်ကောင်စီစစ်ကြောင်းကို အောက်တိုဘာ ၉ ရက် မနက်ပိုင်းက ဆွဲမိုင်း ၅ လုံးနဲ့ တိုက်ခိုက်ခဲ့တယ်လို့ ဒေသတွင်း တော်လှန်ရေးအဖွဲ့ဝင် တဦးက ပြောပါတယ်။

အခုလို တိုက်ခိုက်မှုကြောင့် စစ်ကောင်စီတပ်သား ၇ ဦးထက်မနည်းသေဆုံးပြီး အများအပြား ထိခိုက်ဒဏ်ရာရခဲ့တယ်လို့ ဆိုပါတယ်။

အောက်တိုဘာ ၈ ရက် ညနေပိုင်းက  ကန့်ဘလူမြို့နယ်၊ ဇင်းရွာအနီး စစ်ကောင်စီစစ်ကြောင်းကို ကန့်ဘလူ တပ်ရင်း(၃)နဲ့ ပကဖတွေက  လိုက်လံပစ်ခတ်ရာမှာ နှစ်ဖက် အပြန်အလှန် ပစ်ခတ်မှု ဖြစ်ပွားခဲ့တယ်လို့ Kawlin Info အဖွဲ့ တာဝန်ရှိသူက ပြောပါတယ်။

ပစ်ခတ်မှုဖြစ်ချိန် စစ်တပ်က လက်နက်ကြီးနဲ့ပြန်ပစ်တာကြောင့် အရပ်သား ၂ ယောက်ဖြစ်တဲ့ အသက် ၂၅ နှစ်အရွယ် ရဲမင်းဝေနဲ့ လှိုင်ဇော်ဦးတို့ လက်နက်ကြီးထိမှန်သေဆုံးခဲ့ပြီး စစ်ကောင်စီဘက်က ထိခိုက်သေဆုံးရှိပေမဲ့ စုံစမ်းမရသေးဘူးလို့ သိရပါတယ်။

ဖြစ်စဉ်နဲ့ပတ်သက်လို့ စစ်ကောင်စီဘက် ထိခိုက်ကျဆုံးမှု စာရင်းကိုတော့ သီးခြားအတည်ပြုနိုင်ခြင်း မရှိသေးသလို ထုတ်ပြန်တာလဲ မတွေ့ရသေးပါဘူး။