မွန်ပြည်နယ်၊ ရေး-သံဖြူဇရပ် ကားလမ်းဘေးရှိ ရေးမြို့နယ် အာယုတောင်ကျေးရွာနားက စစ်ကောင်စီတပ်ရင်း  ခလရ ၃၄၃ ကို ရေး PDF မြောက်ပိုင်းနဲ့ ရေး YGF ပြောက်ကျားတပ်ဖွဲ့ တို့ ပူးပေါင်းတိုက်ခိုက်ခဲ့တယ်လို့ ရေး PDF မြောက်ပိုင်းအဖွဲ့ တာဝန်ရှိသူက ပြောပါတယ်။

ခလရ ၃၄၃ ကို အောက်တိုဘာ ၁၈ ရက် ညနေ ၄ နာရီ ၁၅ မိနစ်လောက်မှာ  M79  နဲ့ ၄ ချက် ပစ်ခတ်တိုက်ခိုက်ခဲ့တာဖြစ်ပြီး ကောင်စီတပ်ဘက်က ထိခိုက်သေဆုံးမှု ရှိမရှိကိုတော့ မသိရသေးဘူးလို့ ဆိုပါတယ်။

ပစ်ခတ်မှုအပြီး ည ၈ နာရီဝန်းကျင်မှာ စစ်ကောင်စီတပ်ဘက်က နှင်းစုံကျေးရွာနားကို အမြောက်နဲ့ ပစ်ခတ်ခဲ့ပေမဲ့ ကျေးရွာက နေအိမ်နဲ့ လူထိခိုက်မှုရှိမရှိ မသိရသေးဘူးလို့ ရေး မြောက်ပိုင်း PDF တာဝန်ရှိသူက ပြောပါတယ်။

မွန်ပြည်နယ်အခြေပြု တော်လှန်ရေးတပ်ဖွဲ့ MSRO တာဝန်ခံ ကိုအဂ္ဂ (ခေါ်) ကိုသီဟနေစိုး ကျဆုံးခဲ့တဲ့အတွက် လက်တုံ့ပြန်တဲ့အနေနဲ့ ခလရ ၃၄၃ ကို သွားရောက်တိုက်ခိုက်ခဲ့တာလို့ ဆိုပါတယ်။

အောက်တိုဘာ ၁၇ ရက်က ရေးမြို့နယ်၊ ဇီးဖြူသောင်းကျေးရွာရှိ စစ်ကောင်စီ နယ်မြေရဲစခန်းကို မွန်ပြည်နယ်အခြေပြု တော်လှန်ရေးအဖွဲ့ (MSRO) က သွားရောက် တိုက်ခိုက်ခဲ့ပြီးအပြန် အောက်တိုဘာ ၁၇ ရက် ညနေ ၄ နာရီခွဲလောက်မှာ စစ်ကောင်စီတပ်နဲ့ နှစ်ဖက်ထိတွေ့ တိုက်ပွဲငယ်တခု ဖြစ်ပွားခဲ့ပြီး စစ်ကောင်စီဘက်က အင်အားအလုံးအရင်းနဲ့ တိုက်ခိုက်ခဲ့တဲ့အတွက် MRSO တာဝန်ခံ ကိုအဂ္ဂ (ခေါ်) ကိုသီဟနေစိုး ကျဆုံးခဲ့ပါတယ်။