လူမျိုးရေးခွဲခြားမှု ဆန့်ကျင်ရေးဆန္ဒပြသူ ဒါဇင်ပေါင်းများစွာဟာ အောက်တိုဘာ ၁၈ ရက်မှာ အမေရိကန်ပြည်ထောင်စု လော့စ်အိန်ဂျလိစ်မြို့ကို လာရောက်ကြပြီး မြို့ကောင်စီအဖွဲ့ဝင် ကက်ဗင်ဒီလေယွန်နဲ့ ဂေလ်ချက်ဒယ်လိုတို့ကို လူမျိုးရေးခွဲခြား ဆွေးနွေးထားတဲ့ အသံသွင်းမှတ်တမ်းအတွက် ရာထူးကနေ နုတ်ထွက်ဖို့ တောင်းဆိုခဲ့ပါတယ်။

ကောင်စီဝင်တွေ နုတ်ထွက်ပေးရေး တောင်းဆိုတဲ့ စာသားဆိုင်းဘုတ်တွေ ကိုင်ဆောင်ပြီး ကြွေးကြော်သံတွေ အော်ဆိုကြတဲ့ ဆန္ဒပြသူတွေဟာ မြို့တော်ခန်းမပတ်လည်မှာ ချီတက် ဆန္ဒပြခဲ့ကြပါတယ်။

“လူမည်းတွေကို ပြောင်ပြောင်တင်းတင်း လူမျိုးရေး ခွဲခြားသူတွေအတွက် လော့စ်အိန်ဂျလိစ် မြို့တော်ကောင်စီမှာ နေရာမရှိဘူး” လို့ လော့စ်အိန်ဂျလိစ်မြို့ Black Lives Matter အဖွဲ့ကို ပူးတွဲတည်ထောင်သူ မယ်လီနာ အဗ္ဗဒူလာက ဆန္ဒပြသူတွေကို မိန့်ခွန်းပြောကြားတဲ့အထဲမှာ ထည့်သွင်းပြောကြားပါတယ်။

တခြားဆန္ဒပြခေါင်းဆောင် ဂေါ့ဒ်ရေးပလာတာကလည်း “ငါတို့ကို ကန့်ကွက်ထားပြီး ခေါင်းဆောင်လုပ်လို့မရဘူး။ နုတ်ထွက်မပေးမချင်း ငါတို့ရဲ့အခွန်ငွေတွေကို မင်းရဲ့ဘဏ်အကောင့်ထဲ ထည့်မပေးနိုင်ဘူး” လို့ ပြောပါတယ်။

သြဇာကြီးတဲ့ နိုင်ငံရေးသမား သုံးယောက်နဲ့ ဒေသခံ အလုပ်သမားခေါင်းဆောင် တယောက်တို့ဟာ မြို့မှာ သူတို့ရဲ့အာဏာကို ဘယ်လိုချုပ်ကိုင်ထားမယ်၊ မြို့တော်မှာ လက်တင်အမေရိကန်တွေရဲ့ ဩဇာကို ဘယ်လိုဖြန့်ကြက်မယ် စတာတွေပါဝင်တဲ့ ဖုန်းပြောဆိုမှု မှတ်တမ်း ပြီးခဲ့တဲ့သီတင်းပတ်က ပေါက်ကြားခဲ့တာဖြစ်ပြီး လူမျိုးရေးခွဲခြားထားတဲ့ စကားတွေကြောင့် ဒေါသထွက်ခဲ့ကြတာပါ။

ဖုန်းနဲ့ အသံသွင်းဆွေးနွေးမှုမှာ ပါဝင်ခဲ့ကြတဲ့ ဒီမိုကရက်တစ် မြို့တော်ကောင်စီဝင်တွေဖြစ်တဲ့ ဒီလေယွန်နဲ့ ဂေလ် ချက်ဒယ်လိုတို့ကတော့ ရာထူးနုတ်ထွက်ပေးရေး တောင်းဆိုချက်တွေကို ငြင်းဆန်ခဲ့ပါတယ်။