မကွေးတိုင်း၊ ရေစကြိုမြို့နယ်၊ တောင်ဦးကျေးရွာကို စစ်ကောင်စီတပ်က အောက်တိုဘာ ၁၇ ရက် နေ့ခင်းပိုင်းမှာ မီးရှို့ခဲ့တာကြောင့် နေအိမ် ၁၆ လုံး မီးလောင်ပျက်စီးခဲ့တယ်လို့ ရေစကြို ပြည်သူ့ကာကွယ်ရေးတပ်ဖွဲ့ တာဝန်ရှိသူတယောက်က ပြောပါတယ်။

“အိမ်က လုံးလုံးလောင်ပြီး ပျက်စီးတာ ၁၀ အိမ်၊ မီးစွဲတာက ၆ အိမ်၊ စုစုပေါင်း ၁၆ အိမ်ပါ။ ကျနော်တို့ ရှင်းလင်းရေးဝင်တော့ တွေ့ရတာ အိမ်ကောင်းတွေကိုပဲ ရှို့သွားတာ။ ရှို့ခံရတဲ့အိမ်က မိသားစုတွေကတေ့ မြင်ရတာ စိတ်ကိုမကောင်းဘူး။”

စစ်ကောင်စီတပ်နဲ့ ပြည်သူ့ကာကွယ်ရေးတပ်ဖွဲ့တွေ ​အောက်တိုဘာ ၁၇ ရက် မနက်ပိုင်းက တောင်ဦးရွာအနီးမှာ ထိတွေ့မှုဖြစ်ပွားခဲ့ပြီး စစ်သား ၆ ယောက် သေဆုံးခဲ့ကာ နောက်စစ်သားတွေက တောင်ဦးကျေးရွာကို မီးရှို့ခဲ့တာလို့ ဆိုပါတယ်။

နေအိမ်မီးလောင်ပျက်စီးသွားတဲ့ ရွာသားတွေအတွက် ငွေကြေးကူညီထောက်ပံ့မှုတွေ လိုအပ်နေပြီး အခုအချိန်မှာ မြို့နယ်နဲ့ ရပ်ကျေး ပြည်သူ့ကာကွယ်ရေးအဖွဲ့တွေက ကူညီမှုတွေ လုပ်ဆောင်ပေးနေတယ်လို့ သိရပါတယ်။

ရေစကြိုမြို့နယ်ကို စစ်ကောင်စီတပ်က အင်အား ၂၀၀ ကျော်နဲ့ စစ်ကြောင်းသုံးကြောင်းခွဲကာ စစ်ကြောင်းထိုးနေတယ်လို့ သိရပါတယ်။