အမေရိကန်နှင့်ဗင်နီးဇွဲလား ဆက်ဆံရေး ပြန်ထူထောင်ရန် မက္ကဆီကို သမ္မတ တိုက်တွန်း

မက္ကဆီကိုသမ္မတ Andres Manuel Lopez Obrador က အမေရိကန်နဲ့ ဗင်နီဇွဲလားတို့ကို ဆက်ဆံရေး ပြန်လည်ထူထောင်ဖို့ အောက်တိုဘာ ၂၁ ရက်မှာ တိုက်တွန်းလိုက်ပြီး ရွှေ့ပြောင်းနေထိုင်မှုက စံချိန်တင်အဆင့်တွေကို ရောက်ရှိသွားတာကြောင့် နောက်ထပ် ဗင်နီဇွဲလားနိုင်ငံသားတွေကို အမေရိကန်ကို ဝင်ခွင့်ပြုဖို့ ဝါရှင်တန်ကို ဖိအားပေး ပြောကြားခဲ့ပါတယ်။
မက္ကဆီကိုနဲ့ ဖန်တီးထားတဲ့ မူဝါဒအရ အမေရိကန်ဟာ နယ်စပ်ကို တရားမဝင်ဖြတ်ကျော်ဖို့ ကြိုးစားနေတဲ့ ဗင်နီဇွဲလားနိုင်ငံသားတွေကို ပြန်မောင်းထုတ်နိုင်သလို ကက်သလစ်ချာ့ချ်နဲ့ လူ့အခွင့်အရေးအဖွဲ့တွေရဲ့ ဝေဖန်မှုတွေနဲ့ ရင်ဆိုင်နေရပါတယ်။
မက္ကဆီကို အာဏာပိုင်တွေဟာ သူတို့ပိုင်နက်အတွင်းကိုဝင်ရောက်လာတဲ့ ဗင်နီဇွဲလားနိုင်ငံသား အရေအတွက် တိုးလာခြင်းနဲ့ ပတ်သက်လို့ စိုးရိမ်နေပြီး ဗင်နီဇွဲလားမှာ စီးပွားရေးအခြေအနေ သက်သာရေးနဲ့ ရွှေ့ပြောင်းနေထိုင်သူများ ပြန်လာရေး အဆင်ပြေစေဖို့ ဝါရှင်တန်နဲ့ ကာရာကတ်စ်တို့အကြား ဆက်ဆံရေးကို မြှင့်တင်ဖို့ စိတ်အားထက်သန်နေပါတယ်။
ပုံမှန်သတင်းစာရှင်းလင်းပွဲမှာ Lopez Obrador က အမေရိကန်နဲ့ ဗင်နီဇွဲလားအစိုးရတွေကြား ဆက်ဆံရေး ပြန်လည်ကောင်းမွန်ဖို့ အရေးကြီးကြောင်းနဲ့ လူပေါင်း ၂၄၀၀၀ ကျော်ကို လူသားချင်းစာနာထောက်ထားမှုဆိုင်ရာ ခွင့်ပြုမိန့်ကို တိုးချဲ့ပေးဖို့ အမေရိကန်ကို တိုက်တွန်းခဲ့ပါတယ်။
အမေရိကန် အမျိုးသားလုံခြုံရေးကောင်စီ ပြောရေးဆိုခွင့်ရှိသူရဲ့ ပြောကြားချက်အရ ဗင်နီဇွဲလားအပေါ် အမေရိကန်ရဲ့မူဝါဒမှာ မပြောင်းလဲသေးပေမယ့် ခွင့်ပြုမိန့်ကို တိုးမြှင့်ဖို့ စဉ်းစားနိုင်ကြောင်း အမိမြေလုံခြုံရေးဌာနက ပြောကြားခဲ့ပါတယ်။
အောက်တိုဘာ ၁၂ ရက်က ဗင်နီဇွဲလားနိုင်ငံသား ၂၄၀၀၀ ကို လက်ခံပေးမယ့် အစီအစဉ်သစ်ကို ထုတ်ပြန်ကြေညာခြင်း မပြုခင်က ၂၀၁၉ ခုနှစ်တုန်းက ဗင်နီဇွဲလားနဲ့ သံတမန်ဆက်ဆံရေး ပျက်ပြားခဲ့တဲ့ အမေရိကန်ဟာ နိုင်ငံထဲကို တရားမဝင် ဖြတ်ကျော်လာတဲ့ ဗင်နီဇွဲလားနိုင်ငံသားတွေ ကို ပြန်ပို့ဖို့ ခက်ခဲတာကြောင့် မကြာခဏ နေထိုင်ခွင့်ပေးခဲ့ပါတယ်။
ဒီမူဝါဒကို ပြဋ္ဌာန်းပြီနောက်ပိုင်း အမေရိကန်ကို တရားမဝင် ဝင်ရောက်လာတဲ့ ဗင်နီဇွဲလား ထောင်ပေါင်းများစွာကို မက္ကဆီကို ကို ပြန်ပို့ခဲ့ပါတယ်။
၂၀၂၁ အောက်တိုဘာလ ကနေ ၂၀၂၂ ခုနှစ် သြဂုတ်လအတွင်း အမေရိကန်-မက္ကဆီကိုနယ်စပ်မှာ ဗင်နီဇွဲလား နိုင်ငံသား ၁ သိန်း ၅ သောင်းကျော်ကို ဖမ်းဆီးခဲ့ရပြီး ၂၀၂၁ ဘဏ္ဍာနှစ်တစ်ခုလုံးရဲ့ အရေအတွက်ထက် ၃ ဆပိုများတယ် လို့ US ဒေတာက ဖော်ပြပါတယ်။