close

ပါကစ္စတန်ဝန်ကြီးချုပ်ဟောင်းကို ပြည်သူ့တာဝန်ထမ်းဆောင်ခွင့် ပိတ်ပင်၊ ထောက်ခံသူများ ဆန္ဒပြ

ပါကစ္စတန် ဝန်ကြီးချုပ်ဟောင်း အင်မ်ရန်ခန်းဟာ နိုင်ငံရပ်ခြား ဂုဏ်သရေရှိပုဂ္ဂိုလ်တွေနဲ့ နိုင်ငံ့ခေါင်းဆောင်တွေဆီက လက်ဆောင်ပစ္စည်းတွေကို တရားမဝင် ရောင်းချမှုနဲ့ အပြစ်ရှိကြောင်း ထိပ်တန်း ရွေးကောက်ပွဲခုံရုံးက တွေ့ရှိခဲ့ပြီး သူ့ကို ပြည်သူ့တာဝန်ထမ်းဆောင်ခွင့် ပိတ်ပင်တားမြစ် လိုက်ပြီးနောက်မှာ အောက်တိုဘာ ၂၁ ရက်မှာ ဆန္ဒပြသူတွေ လမ်းပေါ်ထွက်လာခဲ့ကြပါတယ်။

ဒီစီရင်ချက်ကြောင့် ခန်းကို ထောက်ခံသူတွေဟာ မြို့အသီးသီးမှာ လမ်းတွေပေါ် ထွက်ပြီးတော့ လမ်းတွေနဲ့ အဝေးပြေးလမ်းတွေကို ပိတ်ဆို့ပြီး တာယာတွေကို မီးရှို့ခဲ့ကြပါတယ်။ 

ခန်းကို ထောက်ခံသူတွေဟာ မြို့အသီးသီးမှာ ဆန္ဒပြခဲ့ကြတယ်လို့ အာဏာပိုင်တွေက ပြောပါတယ်။ 

အဲဒီနေ့နှောင်းပိုင်းမှာ ခန်းဟာ ဆန္ဒပြမှုတွေကို ရပ်တန့်ဖို့ ထောက်ခံသူတွေကို တောင်းဆိုခဲ့ပြီး သူဟာ တရားရုံးမှာ စီရင်ချက်ကို ရင်ဆိုင်ပြီးတော့ စီရင်ချက်ကို ပြောင်းပြန်ဖြစ်အောင် လုပ်မယ် လို့ ပြောပါတယ်။ 

ခရစ်ကက်သမားကနေ နိုင်ငံရေးသမား ဖြစ်လာတဲ့ အသက် ၇၀ အရွယ် အင်မ်ရန် ခန်း ဟာ သူ့ရဲ့ ၂၀၁၈ ကနေ ၂၀၂၂ ခုနှစ်အထိ ဝန်ကြီးချုပ် သက်တမ်းအတွင်း သူ နိုင်ငံခြားတိုင်းပြည်တွေကို သွားရောက်ခဲ့ချိန်တွေမှာ ရရှိခဲ့တဲ့ ပါကစ္စတန်ရူပီး သန်း ၁၄၀ ကျော် တန်ဖိုးရှိတဲ့ နိုင်ငံပိုင်လက်ဆောင်ပစ္စည်းတွေကို ရာထူးကို အလွဲသုံးစားလုပ်ပြီး အရောင်းအဝယ်တွေ ပြုလုပ်ခဲ့ကြောင်း စွပ်စွဲခံခဲ့ရတာပါ။ 

ခန်းကတော့ သူ ဘာအမှားအယွင်းမှ မလုပ်ကြောင်း ငြင်းဆိုခဲ့ပါတယ်။ ဒီဆုံးဖြတ်ချက်ကို "ဘက်လိုက်တယ်" လို့ ကြေညာခဲ့ပြီး သူဟာ ဒီပစ္စည်းတွေကို တရားဝင် ဝယ်ယူခဲ့ကြောင်း ပြောကြားခဲ့ပါတယ်။ 

ခုံရုံးဖြစ်တဲ့ ပါကစ္စတန် ရွေးကောက်ပွဲ ကော်မရှင်ဟာ ဝန်ကြီးချုပ်ဟောင်းကို ပြည်သူ့တာဝန်တွေ ထမ်းဆောင်ခွင့် ဘယ်လောက် ကြာအောင် ပိတ်ပင်ထားမယ် ဆိုတာမျိုး အသေးစိတ် အချက်အလက်တွေ ပါရှိတဲ့ စီရင်ချက်ကို တရားဝင်ထုတ်ပြန်ခြင်း မရှိသေးပါဘူး။ 

ခန်းဟာ ၅ နှစ်တာ ပြည်သူ့တာဝန်ထမ်းဆောင်ခွင့် အရည်အချင်း မပြည့်မီကြောင်း  ဥပဒေရေးရာဝန်ကြီး Azam Nazeer Tarar က ပြောကြားခဲ့ပါတယ်။ 

ရာထူးက ဖယ်ရှားခံရပြီးကတည်းက ခန်းဟာ နိုင်ငံတဝှမ်းမှာ လျှပ်တပြက် ရွေးကောက်ပွဲ ကျင်းပပေးဖို့ တောင်းဆိုဆန္ဒပြပွဲတွေ ပြုလုပ်ခဲ့ပါတယ်။ 

ဒါပေမယ့် အစိုးရက လာမယ့်နှစ် အောက်တိုဘာလ သို့မဟုတ် နိုဝင်ဘာလမှာ စီစဉ်ထားတဲ့အတိုင်း ကျင်းပမယ် လို့ ပြောကြားထားပါတယ်။ 

Independent media are under attack by the Myanmar junta. DVB continues reporting the facts, but needs support for the safety of our journalists. You help with any donation. Thank you.

Donate
Up