ယူကရိန်းနိုင်ငံ အရှေ့ဘက်ခြမ်း Bakhmut မြို့တဝိုက်မှာ တိုက်ပွဲတွေ ပြင်းပြင်းထန်ထန် ဖြစ်ပွားနေတာကြောင့် ယူကရိန်းတပ်ဖွဲ့တွေဟာ သိမ်းပိုက်ရရှိထားတဲ့ ရုရှားအမြောက်တွေသုံးပြီး ရုရှားပစ်မှတ်တွေကို မြို့ရဲ့ရှေ့တန်း စစ်မြေပြင်ကနေ နိုဝင်ဘာ ၄ ရက်နေ့က ပစ်ခတ်ခဲ့ပါတယ်။ 

ယူကရိန်းတပ်ဖွဲ့ဝင်တွေက သိမ်းပိုက်ထားတဲ့ ရုရှားရဲ့ T-80 တင့်ကား နဲ့ 2S23 Nona SVK အမြောက်တလက်တို့နဲ့ ရုရှားပစ်မှတ်တွေကို ပစ်ခတ်နေတာလို့ ရိုက်တာသတင်းမှာ ဖော်ပြပါတယ်။ 

ယူကရိန်းစစ်သံမှူးတဦးရဲ့အဆိုအရ အဲဒီလက်နက် ၂ ခုလုံးကို မတ်လမှာ ရုရှားဆီကနေ သိမ်းဆည်းဆီးရမိခဲ့ပြီး ယူကရိန်းစစ်တပ်မှာ ပြန်သုံးလို့ရအောင် လပေါင်းများစွာ အချိန်ယူပြင်ဆင်ခဲ့ရတယ်လို့ သိရပါတယ်။ 

ယူကရိန်းတပ်ဖွဲ့ဝင်တွေက လက်ဆောင်တွေလို့ ခေါ်ဆိုသုံးနှုန်းကြတဲ့ ဒီလက်နက် ၂ ခုကို အခုတော့ ဝိုင်းရံခံထားရတဲ့ Bakhmut မြို့ကနေ ရုရှားတွေရဲ့ တိုက်ခိုက်မှုကို ကာကွယ်ဖို့ သုံးစွဲနေတာပါ။ 

T-80 တင့်ကားဒရိုင်ဘာ Serhii က လတ်တလောရက်တွေအတွင်း နှစ်ဖက် အပြန်အလှန်ပစ်ခတ်မှုတွေ လျော့နည်းသွားတယ်လို့ ပြောပါတယ်။ ပြီးခဲ့တဲ့သီတင်းပတ်တုန်းကတော့ ပြင်းထန်တဲ့ တိုက်ပွဲတွေဖြစ်ပွားခဲ့ကြောင်း စက်ပြင်ခြေလျင်တိုက်ခိုက်ရေးတပ်ဖွဲ့မှ တပ်စိပ်မှူးတယောက်က ရိုက်တာကို ပြောထားပါတယ်။ Bakhmut တိုက်ပွဲမှာ ပုဂ္ဂလိကရုရှားစစ်တပ်ကုမ္ပဏီ Wagner အဖွဲ့က ကြီးကြီးမားမား ပါဝင်နေဖွယ်ရှိကြောင်း ဗြိတိန်ကာကွယ်ရေးဝန်ကြီးဌာနက ဆိုပါတယ်။ 

ရုရှားစစ်တပ်ဟာ ဇွန်လနဲ့ဇူလိုင်လမှာ Lysychansk နဲ့ Sievierodonetsk ဒေသတွေဆီက အဓိကစက်မှုမြို့တွေကို သိမ်းယူခဲ့ပြီးနောက်မှာ Bakhmut မြို့ဟာ Donetsk ဒေသတလျှောက် ရုရှားစစ်တပ်က အရှိန်အဟုန်နဲ့ချီတက်နေတဲ့ ပစ်မှတ်ဖြစ်လာပါတယ်။