ယူကရိန်းနိုင်ငံအပေါ် ဒုံးကျည်နဲ့ ပစ်ခတ်တိုက်ခိုက်မှုတွေနဲ့ပတ်သက်ပြီး အမေရိကန်နဲ့ သူ့မဟာမိတ်တွေဟာ ရုရှားကို နိုဝင်ဘာ ၁၆ ရက်က ကုလသမဂ္ဂလုံခြုံရေးကောင်စီ အစည်းအဝေးတခုမှာ  ဝေဖန်ပြစ်တင်ခဲ့ပါတယ်။

ယူကရိန်းရဲ့ လေကြောင်းရန်ကာကွယ်ရေး ပစ်ခတ်မှုကနေ သွေဖည်လာတဲ့ ဒုံးကျည်တစင်း ပိုလန်နိုင်ငံတွင်း ကျရောက်ခဲ့ပြီး နောက်တရက်မှာပဲ ခုလို ပြစ်တင်ရှုတ်ချခဲ့တာပါ။

အဲဒီဒုံးကျည်ဟာ ရုရှားရဲ့တိုက်ခိုက်မှု မဟုတ်ဘဲ ယူကရိန်းရဲ့ လေကြောင်းရန်ကာကွယ်ရေးမှ ပစ်လွှတ်ခဲ့တာဖြစ်နိုင်ကြောင်း စစ်ရေးမဟာမိတ်အဖွဲ့ နေတိုးနဲ့ သူ့အဖွဲ့ဝင် ပိုလန်က စစ်ပွဲကျယ်ပြန့်လာမှာကို နိုင်ငံတကာက စိုးရိမ်မှုတွေ လျော့ပါးစေအောင် ပြောပါတယ်။

ယူကရိန်းသမ္မတ ဗိုလိုဒီမာ ဇလန်းစကီးကလည်း ဒီဒုံးကျည်ဟာ ယူကရိန်းလက်ချက် မဟုတ်ဘူး ဆိုတာကို သံသယဖြစ်စရာမရှိကြောင်း ငြင်းဆိုလိုက်ပါတယ်။

ရုရှားရဲ့ မလိုအပ်ဘဲ ယူကရိန်းကို ကျူးကျော်မှုနဲ့ ယူကရိန်းရဲ့ အရပ်ဘက် အခြေခံအဆောက်အအုံတွေကို မကြာသေးခင်က ဒုံးကျည်နဲ့ တိုက်ခိုက်မှုတွေအတွက် ယူကရိန်းက ကာကွယ်ပိုင်ခွင့်ရှိကြောင်း ကုလသမဂ္ဂဆိုင်ရာ ဝါရှင်တန်သံအမတ် လင်ဒါ သောမတ်စ် ဂရင်းဖီးလ်က လုံခြုံရေးကောင်စီကို ပြောကြားခဲ့ပါတယ်။

ကုလသမဂ္ဂဆိုင်ရာ ဗြိတိန်နဲ့ ပိုလန် သံအမတ်တွေကလည်း ပိုလန်မှာ ပေါက်ကွဲမှုအတွက် ရုရှားရဲ့ ကျူးကျော်မှုကိုပဲ အဆုံးစွန် အပြစ်တင်ရမှာဖြစ်ကြောင်း ထပ်ပြောခဲ့ပါတယ်။

ရုရှားနိုင်ငံဆိုင်ရာ ကုလသမဂ္ဂသံအမတ်ကြီး ဗာစီလီ နဲဘန်ဇီယာ ကလည်း ဘယ်အခြေအနေမျိုးမှာပဲဖြစ်ဖြစ် အရာအားလုံးအတွက် ရုရှားကိုပဲ အပြစ်တင်ဖို့ ဝိုင်းကြိုးစားမှုတွေကြောင့် အံ့အားသင့်နေရတာ ကြာပြီလို့ အစည်းအဝေးမှာ ပြောသွားပါတယ်။

အင်္ဂါနေ့က ယူကရိန်း-ပိုလန် နယ်စပ်အနီးက ပိုလန်ရွာတရွာမှာ ဒုံးကျည်ကျရောက်ပေါက်ကွဲလို့ လူနှစ်ဦးသေဆုံးခဲ့ပြီး အဲဒီနေ့မှာပဲ ရုရှားဟာ ယူကရိန်းရဲ့ စွမ်းအင်လိုင်းကို ပစ်မှတ်ထားပြီး နိုင်ငံတဝန်းရှိ မြို့တွေကို ဒုံးကျည်အမြောက်အမြား ပစ်ခတ်ခဲ့တာကြောင့် လူပေါင်း သန်းနဲ့ချီ ဓာတ်အားပြတ်တောက်မှုတွေကို ပိုပြီးဆိုးဆိုးရွားရွား ကြုံခဲ့ရပါတယ်။