ကာတာနိုင်ငံမှာ ကျင်းပမယ့် ၂၀၂၂ ခုနှစ် ကမ္ဘာ့ဖလား ဘောလုံးပြိုင်ပွဲ အားကစားရုံတွေနဲ့ အနီးတဝိုက်နေရာတွေမှာ အရက်သေစာ ရောင်းချခွင့်ကို တားမြစ်လိုက်ပြီဖြစ်တယ်လို့ ကမ္ဘာ့ဘောလုံးအဖွဲ့ချုပ် (ဖီဖာ)က အတည်ပြု ထုတ်ပြန်ပါတယ်။

ဒီဆုံးဖြတ်ချက်ကိုတော့ အိမ်ရှင်ကာတာနိုင်ငံက တာဝန်ရှိသူတွေနဲ့ ဆွေးနွေးမှုအပြီးမှာ အတည်ပြုလိုက်တာဖြစ်ပြီးတော့ “အိမ်ရှင်နိုင်ငံအာဏာပိုင်တွေနဲ့ ဖီဖာအနေနဲ့ ပရိသတ်တွေအားလုံးအတွက် ပျော်ရွှင်ဖွယ်၊ လေးစားဖွယ်ကောင်းတဲ့ အတွေ့အကြုံကို ပေးစွမ်းနိုင်စေဖို့အတွက် ဆက်လက်လုပ်ဆောင်သွားမှာဖြစ်တယ်” လို့ ဆိုပါတယ်။

ဒါ့အပြင် ၂၀၂၂ ကမ္ဘာ့ဖလားဘောလုံးပြိုင်ပွဲ ကာလအတွင်း လူတိုင်းအတွက် ဖြည့်ဆည်းပေးမယ့် ဖီဖာနဲ့ ကာတာနိုင်ငံတို့ရဲ့ ပူးတွဲကတိကဝတ်အတွက် (ကမ္ဘာ့ဖလား ဘောလုံးပြိုင်ပွဲတွေမှာ စပွန်ဆာအဖြစ် နှစ်စဉ် တာဝန်ယူနေကျ) AB InBev ကုမ္ပဏီရဲ့ နားလည်မှုနဲ့ စဉ်ဆက်မပြတ် ပံ့ပိုးကူညီမှုတွေကို လည်း အသိအမှတ်ပြု ကျေးဇူးတင်ရှိကြောင်းလည်း ထုတ်ပြန်ချက်မှာ ဆက်လက်ဖော်ပြထားတာပါ။

ဒီဆုံးဖြတ်ချက်အပေါ် ဒေါ်လာသန်းနဲ့ချီ ရင်းနှီးမြုပ်နှံ စာချုပ်ချုပ်ဆိုထားတဲ့ စပွန်ဆာကုမ္ပဏီတွေအနေနဲ့ရော ဘောလုံးပရိသတ်တွေကပါ စိတ်ကသိကအောက် ဖြစ်နေကြရပြီး ကာတာနိုင်ငံကတော့ “အရက်က ဒေသဆိုင်ရာ ယဉ်ကျေးမှုရဲ့ အစိတ်အပိုင်းတခု မဟုတ်ပေမယ့် ဧည့်ဝတ်ကျေပွန်မှုတော့ ရှိရမှာပါ။ ဒီကာလတွေအတွင်း FIFA Fan Festival မှာ ညနေ ၆ နာရီခွဲနောက်ပိုင်းက စတင်ပြီး အရက်ကို ရရှိနိုင်မှာဖြစ်ပြီး လိုင်စင်ရ စားသောက်ဆိုင်တွေ၊ ဘားတွေနဲ့ ဟိုတယ်တွေမှာပါ ရရှိနိုင်မှာဖြစ်တယ်လို့ ဆိုပါတယ်။

ကမ္ဘာ့ဖလား ဘောလုံးပြိုင်ပွဲကို နိုဝင်ဘာ ၂၀ ရက်ကနေ ဒီဇင်ဘာ ၁၈ ရက်အထိ ကျင်းပသွားမှာဖြစ်ပြီး ပထမဆုံးပွဲစဉ်အနေနဲ့ အိမ်ရှင်ကာတာနဲ့ အီကွေဒေါအသင်းတို့ ယှဉ်ပြိုင်ကစားကြမှာ ဖြစ်ပါတယ်။