ယူကရိန်းဟာ သူ့ရဲ့ စွမ်းအင်စက်ရုံ အဆောက်အဦတွေပေါ် ရုရှားတိုက်ခိုက်မှုတွေကို ကောင်းကောင်းကာကွယ်နိုင်ဖို့အတွက် သူ့ကို လေကြောင်းကာကွယ်ရေးစနစ်တွေနဲ့ ထရန်စဖော်မာတွေ ထောက်ပံ့ပေးဖို့ အနောက်နိုင်ငံ မိတ်ဆွေတွေကို နိုဝင်ဘာ ၂၉ ရက်မှာ တိုက်တွန်းလိုက်ပါတယ်။

ယူကရိန်းနိုင်ငံခြားရေးဝန်ကြီး ဒီမီထရို ကူလေဘာက လေကြောင်းရန်ကာကွယ်ရေး စနစ်အမျိုးမျိုးကို ကိုးကားပြီး “ကျနော်တို့ဟာ လေကြောင်းရန်ကာကွယ်ရေးတွေ၊ အိုင်းရစ္စ၊ ဟော့ခ်စ်၊ ပက်ထရီယော့ထ်စ်တွေ လိုအပ်ပြီး ထရန်စဖော်မာတွေလည်း လိုအပ်ပါတယ်” လို့ ဘူခါရက်စ်ထ်မှာပြုလုပ်တဲ့ နေတိုးအစည်းအဝေးပွဲရဲ့ ပြင်ပအစီအစဉ်မှာ သတင်းထောက်တွေကို ပြောကြားခဲ့ပါတယ်။

သူတို့ဟာ ထရန်စဖော်မာတွေနဲ့ ဂျင်နရေတာ မီးစက်တွေကိုလည်း လိုအပ်နေပြီး ပြည်သူတွေအတွက် သင့်တင့်လျောက်ပတ်တဲ့ နေထိုင်မှုအခြေအနေတွေကို ပေးနိုင်ဖို့အတွက် သမ္မတပူတင်က ရှင်းထုတ်ဖို့လုပ်နေတဲ့ စွမ်းအင်လိုင်းကို ပြန်ထူထောင်နိုင်မှာဖြစ်တယ် လို့လည်း ကူလေဘာက ဆိုပါတယ်။

ယူကရိန်းမှာသာ လေကြောင်းရန်ကာကွယ်ရေးစနစ်တွေ ရှိလာတဲ့အခါ ရုရှားဒုံးကျည်တိုက်ခိုက်မှုတွေကနေ ဒီအခြေခံအဆောက်အအုံကို ကာကွယ်နိုင်မှာဖြစ်ကြောင်း၊ ရုရှားတိုက်ခိုက်မှုကလည်း ကျိန်းသေပေါက် လာမှာဖြစ်တဲ့အတွက် ဒါကို မလွဲမသွေ ကြိုတင်ပြင်ဆင်ထားရမှာဖြစ်ကြောင်း သူက ပြောပါတယ်။

အင်္ဂါနေ့က နေတိုး နိုင်ငံခြားရေးဝန်ကြီးတွေဟာ ယူကရိန်းနိုင်ငံကို ပံ့ပိုးကူညီဖို့နဲ့ စွမ်းအင်ဆိုင်ရာ အခြေခံအဆောက်အအုံတွေကို ပြန်လည်ပြုပြင်ရာမှာ ကူညီဆောင်ရွက်ပေးဖို့ ကတိပြုခဲ့ကြပါတယ်။