ရုရှားဟာ ပင်လယ်နက် အစိတ်အပိုင်းတွေကို ‘စစ်ပွဲဇုန်’ အဖြစ် ပြောင်းလဲခဲ့တယ်လို့ စွပ်စွဲရင်း အဲဒီနေရာတွေမှာ နေတိုးအဖွဲ့ တည်ရှိမှုကို အားဖြည့်ပေးမယ်လို့ အမေရိကန် နိုင်ငံခြားရေးဝန်ကြီး အန်တိုနီ ဘလင်ကန်က နိုဝင်ဘာ ၂၉ ရက်မှာ ကတိပြုခဲ့ပါတယ်။

“နှစ်တွေအတွင်း အဆိုးရွားဆုံး စားနပ်ရိက္ခာဖူလုံရေး အကျပ်အတည်းတွေထဲက တခုအတွက် ရုရှားမှာ တာဝန်ရှိတယ်။ ပင်လယ်နက်ကနေ ဘောလ်တစ်ပင်လယ်တွေအထိ နေတိုး တပ်စခန်းတွေကို အားဖြည့်ပေးသွားမှာပါ” လို့ ဘလင်ကန်က ရိုမေးနီးယား မဟာမိတ်နဲ့ ပူးတွဲသတင်းစာရှင်းလင်းပွဲမှာ ပြောခဲ့ပါတယ်။

ယူကရိန်းနိုင်ငံရဲ့ စွမ်းအင်လိုင်းကို ပစ်မှတ်ထားတိုက်ခိုက်တဲ့ ရုရှားရဲ့ တိုက်ခိုက်မှုတွေကို ရင်ဆိုင်ရချိန်မှာ ယူကရိန်းရဲ့ ဓာတ်အားပို့လွှတ်နိုင်စွမ်းကို ပြန်ထူထောင်နိုင်ဖို့ အမေရိကန်က ကူညီပေးလိမ့်မယ်လို့ ဘလင်ကန်က ကြေညာဖို့ မျှော်လင့်ထားတယ်လို့ အမေရိကန် နိုင်ငံခြားရေးဝန်ကြီးဌာန အကြီးတန်းအရာရှိတဦးက ပြောခဲ့ပါတယ်။

ဘလင်ကန်ဟာ နိုဝင်ဘာ ၂၈ ရက် ညနေပိုင်းမှာ ရိုမေးနီးယားနိုင်ငံကို ရောက်လာပြီး နေတိုး မဟာမိတ်တွေ၊ အဆင့်မြင့်စီးပွားရေး ၇ နိုင်ငံအုပ်စု G7 က နိုင်ငံခြားရေးဝန်ကြီးတွေနဲ့ တွေ့ဆုံခဲ့ပါတယ်။

ထရန်စဖော်မာတွေဟာ ပြန်ပြင်ဆင်မွမ်းမံဖို့ လိုတဲ့ နိုင်ငံရဲ့ စွမ်းအင်အခြေခံအဆောက်အအုံရဲ့ အကြီးဆုံးလိုအပ်ချက်ပဲလို့ ယူကရိန်းနိုင်ငံခြားရေးဝန်ကြီးက ကိယက်ဗ်မြို့တော်ဆီ လာရောက်လည်ပတ်တဲ့ နေတိုးသံတမန်တချို့ကို အစောပိုင်းမှာ ပြောခဲ့ပါတယ်။