ယူကရိန်းနိုင်ငံ ကိယက်ဗ်ဒေသရှိ နံရံတစ်ခုမှာရေးဆွဲထားတဲ့ နာမည်ကျော် ပန်းချီဆရာ ဘန့်က်စီရဲ့ လမ်းဘေးပန်းချီလက်ရာကို ဖယ်ရှားဖို့ ကြိုးပမ်းမှုကို ရပ်တန့်ခဲ့ရကြောင်း ယူကရိန်းရဲတပ်ဖွဲ့က ဒီဇင်ဘာ ၂ ရက်မှာ ပြောကြားခဲ့ပါတယ်။ 

မီးလောင်ပျက်စီးနေတဲ့ အဆောက်အအုံရဲ့ နံရံပေါ်မှာ ဂတ်စ်မျက်နှာဖုံး ဝတ်ဆင်ပြီး မီးသတ်ဆေးဘူး ကိုင်ဆောင်ထားသော အမျိုးသမီးတစ်ဦးကို ရေးဆွဲထားတဲ့ပုံရိပ် ရှိခဲ့တာပါ။

ယူကရိန်းရဲတပ်ဖွဲ့က သူတို့ဟာ နံရံဆေးရေးပန်းချီကို ဖယ်ရှားထားကြောင်းနဲ့ အခင်းဖြစ်ပွားရာ နေရာမှာ လူအုပ်စုတစု ရှိကြောင်း အသိပေးအကြောင်းကြားချက်ကို တုံ့ပြန်ဆောင်ရွက်ခဲ့တယ် လို့ ပြောပါတယ်။ 

“မနက် ၁၁ နာရီခွဲ လောက်မှာ တိုင်ကြားချက်ရလို့ ရောက်လာတဲ့အခါ ပန်းချီကိုလုယက်ဖို့ ကြိုးစားနေတဲ့ လူ ၈ ယောက်ကို တွေ့ခဲ့ရတယ်” လို့ ကိဗက်ဗ် ဒေသရဲချုပ် အန်ဒရီ နက်ဘီတို့ဗ် က ပြောပါတယ်။ 

ကနဦး စုံစမ်းစစ်ဆေးမှုအတွင်း လူ ၅ ဦးဟာ ကိယက်မှဖြစ်ပြီး ချရ်ကာစီမှ တဦး ပါဝင်တယ်လို့ ဆိုပါတယ်။ 

ဒီကိစ္စကိုစီစဉ်သူဟာ ၁၉၉၀ ပြည့်နှစ်ဖွား ယူကရိန်းလူငယ် တယောက်ဖြစ်ပြီး သူက ဒီအဆောက်အအုံ ဖျက်ချခံရလို့ ပျက်စီးသွားရင် ပန်းချီကားကို ဆုံးရှုံးသွားရတော့မယ်လို့ ထင်ခဲ့ကြောင်း၊ အဲဒါကြောင့် နံရံကို ဖြိုဖျက်ပြီး ပန်းချီကားကို ယူသွားဖို့ ဆုံးဖြတ်ခဲ့တာဖြစ်ကြောင်း ရဲချုပ် နက်ဘီတို့ဗ် က ပြောပါတယ်။ 

လက်ရှိ သူတို့တွေကို ရာဇ၀တ်မှုနဲ့ အမှုဖွင့်ထားပြီး ဖယ်ရှားထားတဲ့ အနုပညာလက်ရာတွေကို ရဲတပ်ဖွဲ့က သိမ်းဆည်းထားကြောင်းလည်း သူက ပြောပါတယ်။ 

ကြံရာပါတွေအားလုံးကိုလည်း ဘူချာခရိုင်ရဲတပ်ဖွဲ့ကို ပို့ဆောင်ထားပြီး စစ်ဆေးမှုတွေ လုပ်နေတယ် လို့ ဆိုပါတယ်။ 

ဘန်က်စီ ပန်းချီကား ပါတဲ့ နံရံတစ်စိတ်တစ်ပိုင်းကို ပြန်ယူထားပြီး အခု သက်သေအထောက်အထား သိမ်းဆည်းခန်းထဲမှာ ရှိနေပါပြီလို့ ကိဗက်ဗ် ဒေသရဲချုပ် အန်ဒရီ နက်ဘီတို့ဗ်က ပြောပါတယ်။ 

ဘန်က်စီရဲ့ပန်းချီလက်ရာတွေ အတော်များများရှိတဲ့ ကိယက်ဗ်ဒေသက မြို့တွေကို ရုရှားက ဧပြီလ အထိ သိမ်းပိုက်ထားခဲ့တာဖြစ်ပြီး မော်စကိုရဲ့ကျူးကျော်စစ် တိုက်ပွဲတွေကြောင့် အနုပညာလက်ရာ အများအပြား ပျက်စီးခဲ့ရပါတယ်။