ဥရောပနိုင်ငံတွေအနေနဲ့ လုံခြုံရေးဆိုင်ရာ တည်ဆောက် ပုံအသစ်တရပ်ကို စဉ်းစားထားသင့်တယ်လို့ ပြင်သစ်သမ္မတ အီမန်နျူရယ်မက်ခရွန်က ဒီဇင်ဘာ ၃ ရက်မှာ ပြောလိုက်ပါတယ်။

ဥရောပဟာ အနာဂတ်မှာ နေချင်တဲ့ လုံခြုံရေး တည်ဆောက်ပုံအတွက် ပြင်ဆင်ထားဖို့ လိုတယ်လို့ အမေရိကန်နိုင်ငံဆီသွားတဲ့ တရားဝင် အလည်အပတ် ခရီးအတွင်း မက်ခရွန်က ပြင်သစ် ရုပ်သံ TF1 နဲ့ LCI တို့နဲ့ လူတွေ့ မေးမြန်းခန်းအတွင်း ပြောပါတယ်။

“ဒါက သမ္မတပူတင် အမြဲပြောခဲ့တဲ့အတိုင်း ကျနော်တို့ ကိုင်တွယ်ရမယ့် မရှိမဖြစ် အချက်တွေထဲက တစ်ခုကတော့ နေတိုးက သူ့ရဲ့ တံခါးပေါက်ကနေ ချက်ခြင်းရောက်လာမှာကို ကြောက်ရွံ့တာ၊ ရုရှားကို ခြိမ်းခြောက်နိုင်တဲ့ လက်နက်တွေ ဖြန့်ကျက်ချထားတာကို ဆိုလိုတာပါ” လို့ မက်ခရွန်က ပြောပါတယ်။

ယူကရိန်းစစ်ပွဲ အဆုံးသတ်ရေးနဲ့ ပတ်သက်လို့ ညှိနှိုင်းဖို့ ရုရှားသမ္မတပူတင်က သဘောတူလာချိန်မှာ အာမခံချက်ပေးဖို့ ပြင်ဆင်ရေးနဲ့ နေတိုးစစ်ရေး မဟာမိတ်အဖွဲ့ရဲ့ နယ်နမိတ်နဲ့ ပတ်သက်တဲ့ အခွင့်အရေး တိုးလာတာအပေါ် ရုရှားရဲ့ စိုးရိမ်ချက်ကို ဘယ်လို ရည်ညွှန်းမလဲဆိုတဲ့ အချက်တွေအတွက် စဉ်းစားဖို့လည်း ပြင်သစ်ခေါင်းဆောင်က တိုက်တွန်းပါတယ်။

“ဒီအကြောင်းအရာဟာ ငြိမ်းချမ်းရေးအတွက် ခေါင်းစဉ်တစ်ခုအနေနဲ့ ပါဝင်မှာဖြစ်ပြီး၊ ညှိနှိုင်းရေး စားပွဲဝိုင်းကို ပြန်ရောက်တဲ့နေ့မှာ ကျနော်တို့ရဲ့ မဟာမိတ်တွေနဲ့ အဖွဲ့ဝင်နိုင်ငံတွေကို ဘယ်လို ကာကွယ်မလဲ၊ ရုရှားကို ဘယ်လို အာမခံချက်ပေးမလဲဆိုတာကို ပြင်ဆင်ထားဖို့ လိုပါတယ်။”လို့ လည်း မက်ခရွန်က ပြောပါတယ်။ 

ရုရှားက ယူကရိန်းကို မကျူးကျော်ခင် သီတင်းပတ် နည်းနည်းအလို ဖေဖော်ဝါရီ ၈ ရက်က ရုရှားနိုင်ငံ မော်စကိုမြို့မှာ မက်ခွန်းနဲ့ ပူးတွဲသတင်းစာ ရှင်းလင်းပွဲအတွင်း ပူတင်က နေတိုးတပ်တွေ မတိုးချဲ့ဖို့၊ အနီးအနားမှာ ဒုံးကျည်တပ်ဖြန့်တာ မလုပ်ဖို့နဲ့  ရုရှရဲ့ နယ်နိမိတ်တွေနဲ့ ဥရောပက နေတိုးရဲ့ စစ်ဘက်ဆိုင်ရာအခြေခံအဆောက်အအုံတွေကို ၁၉၉၇ ခုနှစ်တုန်း အဆင့်အထိ ပြန်လျှော့ချဖို့ သူ့ရဲ့ အဓိက လုံခြုံရေး တောင်းဆိုချက် (၃) ရပ်အတွက် အနောက်နိုင်ငံတွေဆီက အဖြေရဖို့ ဆက်လက်ကြိုးပမ်း သွားမယ်လို့ ပြောခဲ့ပါတယ်။ 

အမေရိကန် သမ္မတ ဂျိုးဘိုင်ဒန်က ရုရှားခေါင်းဆောင်နဲ့ စကားပြောဖို့ အသင့်ရှိတယ်လို့ အကြံပြုခဲ့ ပြီးတဲ့နောက် ယူကရိန်းပဋိပက္ခအတွက် ဖြစ်နိုင်ခြေရှိတဲ့ ပြေလည်မှုတွေရဖို့ ဆွေးနွေးရေး ရုရှားသမ္မတ ပူတင်က လမ်းဖွင့်ထားတယ် သံတမန်ရေး အဖြေရှာဖို့ ယုံကြည်တယ်လို့ ဒီဇင်ဘာ ၂ ရက်မှာ ရုရှား သမ္မတ နန်းတော်က ပြောခဲ့ပါတယ်။