သြစတြေးလျအတွက် ရေငုပ်သင်္ဘောတည်ဆောက်ရေး သဘောတူညီချက်ဟာ တရုတ်နိုင်ငံနဲ့ ထိပ်တိုက် ရင်ဆိုင်ခြင်း မဟုတ်ကြောင်း ပြင်သစ်သမ္မတ အီမန်နျူယယ် မက်ခွန်းက နိုဝင်ဘာ ၁၇ ရက်မှာ ပြောကြားခဲ့ပါတယ်။ 

သြစတေးလျနဲ့ချမှတ်ထားတဲ့ မဟာဗျူဟာက အင်ဒို-ပစိဖိတ်ဒေသရဲ့ လွတ်လပ်မှုနဲ့ အချုပ်အခြာ အာဏာကို ဆိုလိုထားတဲ့ လော့ဂျစ်နဲ့ အပြည့်အဝ ကိုက်ညီတဲ့ မဟာဗျူဟာတရပ်ပါ”လို့ အာရှပစိဖိတ် စီးပွားရေး ပူးပေါင်းဆောင်ရွက်ရေး (APEC) ဖိုရမ်ကို တက်ရောက်နေတဲ့ မက်ခွန်းက ပြောပါတယ်။

နျူကလီးယားစွမ်းအင်သုံး ရေငုပ်သင်္ဘောတွေ မဟုတ်တာကြောင့် တရုတ်နဲ့ ထိပ်တိုက်ရင်ဆိုင်ဖို့ လည်း မရှိဘူးလို့ သူက ဆိုပါတယ်။ 

ဒါပေမဲ့အရင်ဝန်ကြီးချုပ်ဟောင်း မောရစ်ဆင်ရဲ့ ရွေးချယ်မှုက ဆန့်ကျင်ဖက် ဖြစ်နေပြီး နျူကလီးယား ထိပ်တိုက်ရင်ဆိုင်မှုထဲကို ပြန်ရောက်လာတာ လို့လည်း ပြောပါတယ်။

ဝန်ကြီးချုပ်ဟောင်း မောရစ်ဆင်ရဲ့ အစိုးရလက်ထက် ၂၀၂၁ ခုနှစ်က သြစတြေးလျဟာ ပြင်သစ် စစ်တပ်သင်္ဘောကျင်း Naval Group နဲ့ ဒေါ်လာဘီလီယံပေါင်းများစွာတန်တဲ့ ရေငုပ်သင်္ဘောတွေ မှာယူမှုတွေကို ပယ်ဖျက်ခဲ့ပြီး အဲဒီအစား အမေရိကန်နဲ့ ဗြိတိန်တို့နဲ့ တခြား သဘောတူညီချက် တစ်ခုကို ရွေးချယ်ခဲ့ပါတယ်။ 

ဒီအငြင်းပွားဖွယ် ဆုံးဖြတ်ချက်အတွက် သြစတြေးလျ ဝန်ကြီးချုပ်သစ် အန်တိုနီ အယ်လ်ဘာနီးစ် ရဲ့ အစိုးရဟာ ယူရို ၅၅၅ သန်းနဲ့ ပြေလည်မှု ရရှိခဲ့ပြီး ဒီဆောင်ရွက်ချက်ဟာ နှစ်နိုင်ငံကြား အကွဲအပြဲကို ပြုပြင်ရာမှာ အထောက်အကူဖြစ်လိမ့်မယ်လို့ ကင်ဘာရာက မျှော်လင့်ထားပါတယ်။