သမိုင်းတလျှောက် ဝင်ငွေအများဆုံးရရှိခဲ့တဲ့ Avatar ရုပ်ရှင်ကို ထုတ်လွှင့်ပြသခဲ့အပြီး ၁၃ နှစ်အကြာမှာ ရုပ်ရှင်ဒါရိုက်တာ ဂျိမ်းစ်ကင်မရွန်းဟာ အဲဒီရုပ်ရှင်ရဲ့ နောက်ဆက်တွဲ “Avatar: The Way of Water” ဇာတ်ကားသစ်ကို ဒီဇင်ဘာ ၆ ရက်က လန်ဒန်မှာ ပြသခဲ့ပါတယ်။

ဇာတ်ကားသစ်ဟာ ပထမဇာတ်ကားတုန်းက လရဲ့ သဘာဝအရင်းအမြစ်တွေအတွက် နယ်ချဲ့လူသားတွေကို တိုက်ခိုက်ခဲ့ကြတဲ့ ဒေသခံ နာဗီ အပြာရောင်လူမျိုးတွေ နေထိုင်ရာ စွဲမက်စရာ ပန်ဒိုရာကမ္ဘာဆီ ပရိသတ်တွေကို ပြန်လည်ခေါ်ဆောင်သွားမှာဖြစ်ပါတယ်။

ဆယ်စုနှစ်တခုကျော် ကာလမှာတော့ ဂျိတ်ခ်ဆူလီနဲ့ နေးထီရိအဖြစ် သရုပ်ဆောင်ခဲ့ကြတဲ့ ဆမ် ဝပ်သင်တန်နဲ့ ဇိုး ဆလ်ဒါနာ တို့ကို အခု ကလေး ၅ ဦးရဲ့ မိဘတွေအဖြစ် တွေ့မြင်ရပါတယ်။

ဒီဇာတ်ကားသစ်မှာတော့ သူတို့မိသားစုနဲ့ သူတို့ရဲ့မျိုးနွယ်ကို ကာကွယ်ဖို့အတွက် ဆူလီ၊ နေးထီရိနဲ့ သူတို့ရဲ့ကလေးတွေဟာ ဝေးလံခေါင်သီတဲ့ နယ်မြေကို ထွက်ပြေးကြပြီး ပင်လယ်သမုဒ္ဒရာထဲက မက်ကယီနာ မျိုးနွယ်စုနဲ့အတူ ခိုလှုံခွင့်ရှာတဲ့အကြောင်း ရိုက်ကူးထားပါတယ်။

၂၀၀၉ ခုနှစ်က ထွက်ရှိခဲ့တဲ့ Avatar မူရင်းဇာတ်ကားဟာ တကမ္ဘာလုံး လက်မှတ်ရောင်းရငွေ ၂ ဒသမ ၉ ဘီလီယံကျော်နဲ့ သမိုင်းတလျှောက် ဝင်ငွေအကောင်းဆုံး ရုပ်ရှင်နေရာမှာ ရပ်တည်ခဲ့ပါတယ်။

“Avatar” ဇာတ်ကားကို ၂၀၂၈ ခုနှစ်အထိ ရုပ်ရှင် ၄ ကား ရိုက်ကူးဖို့ စီစဉ်ထားပါတယ်။ ထုတ်လုပ်သူ ဂျွန် လန်ဒေါင်န်က တတိယမြောက် ဇာတ်ကားကိုလည်း ဇာတ်ဝင်ခန်းအများစုကို ရိုက်ကူးခဲ့ကြောင်း ထည့်သွင်းပြောကြားခဲ့ပါတယ်။