အမေရိကန်ပြည်ထောင်စုရဲ့  အဓိကကျတဲ့ပြည်နယ်တွေကို ဆောင်းတွင်းမုန်တိုင်း ရိုက်ခတ်သွားခဲ့ပြီး မြောက်ပိုင်းလွင်ပြင်ကို ဆီးနှင်းတွေ ထူထူထပ်ထပ် ကျဆင်းခဲ့ကာ နှင်းမိုးတွေလည်း ရွာချခဲ့တာကြောင့် ကုန်တင်ကားမောင်းသမားတွေဟာ ဒီဇင်ဘာ ၁၃ ရက်က နီဘရာစကာပြည်နယ်မှာ ရပ်နားခဲ့ရပါတယ်။

နှင်းမုန်တိုင်းလို အခြေအနေတွေကြောင့် ဒါကိုတာစ်နဲ့ နီဘရာစကာတလျှောက်ရှိ ခရိုင်တွေမှာ စာသင်ကျောင်းတွေ ပိတ်ခဲ့ရပါတယ်။

ဆီးနှင်းတွေနဲ့ ရေခဲတွေ စုပုံနေတာကြောင့် အဝေးပြေးလမ်းတွေနဲ့ ကားလမ်းအများအပြားကို ပိတ်ပစ်ခဲ့ရကာ သယ်ယူပို့ဆောင်ရေး တာဝန်ရှိသူတွေက ဒေသခံတွေကို အိမ်မှာပဲနေကြဖို့ တိုက်တွန်းထားပါတယ်။

အမေရိကန်ပြည်ထောင်စုကိုဖြတ်ပြီး အရှေ့-အနောက် ဖြတ်ကျော်သွားတဲ့ အဝေးပြေးလမ်းဖြစ်တဲ့ နီဘရာစကာပြည်နယ်က ပြည်နယ်တွင်းလမ်းမကြီးတခုကို ပိတ်ထားရပြီး ကုန်ကားတွေကို မုန်တိုင်းဒဏ်ကနေ လွတ်ကင်းအောင် ရပ်နားကွင်းကြီးထဲမှာ ရပ်ခိုင်းထားတာပါ။

မုန်တိုင်းကြောင့် အင်္ဂါနေ့မွန်းလွဲပိုင်းအထိ လေယာဉ်ခရီးစဉ် ၇၀ ကျော်ကို ဖျက်သိမ်းခဲ့ရပြီး တခြားခရီးစဉ် ၈၀၀ နီးပါး နှောင့်နှေးမှုတွေ ရှိခဲ့တယ်လို့ Flightaware.com က သူ့ရဲ့ Misery Map မြေပုံမှာ ဖော်ပြခဲ့ပါတယ်။

“ဒီမုန်တိုင်းစနစ်က ရော့ကီးစ်ကနေ အရှေ့ဘက်ကမ်းရိုးတန်းအထိ အများကြီး ကျယ်ကျယ်ပြန့်ပြန့်နဲ့ သက်ရောက်မှုရှိတဲ့ ရာသီဥတုအန္တရာယ်တွေကို ဆက်လက်ဖြစ်ပေါ်စေမှာပါ” လို့ အမျိုးသားမိုးလေဝသဌာန (NWS) က ခန့်မှန်းထားပါတယ်။