ရုရှားကာကွယ်ရေးဝန်ကြီး ဆာဂီလ်ရွှိုင်ဂူဟာ ရုရှားအစိုးရရဲ့ အထူးစစ်ဆင်ရေးမှာ ပါဝင်နေတဲ့ ယူကရိန်းနိုင်ငံထဲက တပ်ဖွဲ့တွေကို စစ်ဆေးခဲ့တယ်လို့ ကာကွယ်ရေးဝန်ကြီးဌာနက ဒီဇင်ဘာ ၁၈ ရက်မှာ ပြောပါတယ်။

"ရုရှားစစ်တပ်အကြီးအကဲဟာ တပ်ဖွဲ့ဝင်တွေ ဖြန့်ကျက်ထားတဲ့ နေရာဆီ လေယာဉ်နဲ့ ရောက်လာပြီး အထူးစစ်ရေးဇုန်အတွင်း ရုရှားတပ်ဖွဲ့တွေရဲ့ အဆင့်မြင့် ရာထူးတွေကို စစ်ဆေး ခဲ့တယ်လို့ ဝန်ကြီးဌာနက တယ်လီဂရမ်မှာ ပြောပါတယ်။

ကာကွယ်ရေးဝန်ကြီးဟာ ရှေ့တန်းနဲ့ ကွပ်ကဲရေးစခန်းတွေမှာ  တပ်ဖွဲ့တွေနဲ့ တွေ့ဆုံ စကားပြောခဲ့တယ်လို့ ၀န်ကြီးဌာနရဲ့ ထုတ်ပြန်ချက်မှာ ဖော်ပြထား ပါတယ်။

ရုရှားသမ္မတ ဗလာဒီမာပူတင်ဟာ ရွှိုင်ဂူ အပါအဝင် နိုင်ငံရဲ့ ထိပ်တန်းခေါင်းဆောင်တွေနဲ့ တွေ့ဆုံပြီး ယူကရိန်းမှာ ရုရှားရဲ့ စစ်ရေးလှုပ်ရှားမှုကို ဘယ်လိုဆက်လုပ်သင့်တယ်ထင်လဲဆိုတဲ့ အဆိုပြုချက် တွေကို တောင်းခံပြီးတဲ့နောက် ကြေညာချက် ထွက်ပေါ်လာတာပါ။

ရုရှားကာကွယ်ရေးဝန်ကြီးဌာနဟာ မော်စကိုမြို့အနောက်ဘက် တီဗာဒေသမှာ တိုက်ခိုက် လေ့ကျင့်နေတဲ့ မိုဘိုင်းယားရ်စ် ဗျူဟာမြောက် ဒုံးကျည်ပစ်လွှတ်နေပုံကို ပြတဲ့ ဗီဒီယိုဖိုင်ကို ဒီဇင်ဘာ ၁၆ ရက်က ထုတ်ပြန်ခဲ့ ပါတယ်။

ရုရှားနိုင်ငံက RS-24 ယားရ်စ် ဒါမှမဟုတ် SS-29 လို့ စစ်ရေး မဟာမိတ်အဖွဲ့ NATO က သတ်မှတ်ထားတဲ့ ဒုံးကျည်တွေဟာ စစ်ဆင်ရေး အကွာအဝေး မိုင် ၇၅၀၀ အထိ ရှိပါတယ်။

၂၀၀၇ ခုနှစ်မှာ ပထမဆုံးစမ်းသပ်ပစ်ခတ်ခဲ့တဲ့ ယားရ်စ် ဒုံးကျည်တွေကို ခေတ်မမီတော့တဲ့ တိုပို ဒုံးကျည်တွေရဲ့နေရာမှာ စပြီး အစားထိုးနေပြီလို့ ရိုက်တာ သတင်းဌာနက ဖော်ပြခဲ့ပါတယ်။

ယူကရိန်းအရှေ့ပိုင်း ဘက်မွတ်ထ်မြို့မှာ တိုက်ပွဲပြင်းထန်ပုံကို ရိုက်ကူးထားသည့် ဒရုန်းရုပ်သံ တခုမကြာသေးခင်က ထွက်ပေါ်လာပြီး  အဆောက်အအုံတွေ မီးလောင် ပျက်စီးတာတွေနဲ့ အတူ ပေါက်ကွဲမှုအများအပြားကို ဗီဒီယိုထဲမှာ မြင်ရပါတယ်။ 

ရုရှားက အမြောက်တွေ မော်တာတွေနဲ့ ယူကရိန်း အရပ်ဘက် အခြေခံအဆောက်အအုံတွေကို ဖျက်ဆီးနေတယ်လို့ ဗီဒီယိုသတင်းရင်းမြစ်က ပြောပါတယ်။