မြန်မာနိုင်ငံကို ၂၀၂၂-၂၀၂၃ ဘဏ္ဍာနှစ် ဒီဇင်ဘာလအထိ  ၉ လအတွင်းမှာ နိုင်ငံခြား ရင်းနှီးမြှုပ်နှံမှုပမာဏ ၁ ဒသမ ၄၆၂ ဘီလီယံသာ ဝင်ရောက်ခဲ့ပြီး အဲဒီပမာဏဟာ အရင် အန်အယ်လ်ဒီအစိုးရ လက်ထက်က ဝင်ရောက်ခဲ့တဲ့ ပမာဏရဲ့ သုံးပုံ တစ်ပုံသာရှိတယ်လို့ ရင်းနှီးမြှုပ်နှံမှုနဲ့ ကုမ္ပဏီများညွှန်ကြားမှု ဦးစီးဌာနရဲ့ စာရင်းအရ သိရပါတယ်။

ပြီးခဲ့တဲ့ အန်အယ်လ်ဒီအစိုးရ လက်ထက် ၂၀၁၉-၂၀၂၀ ဘဏ္ဍာနှစ်က နိုင်ငံခြားရင်းနှီးမြှုပ်နှံမှု ပမာဏ ၄ ဒသမ ၈ ဘီလီယံကျော်ထိ ဝင်ရောက်ခဲ့ပါတယ်။ စစ်ကောင်စီ အာဏာသိမ်းထားတဲ့ ၂၀၂၀-၂၀၂၁ ဘဏ္ဍာနှစ်မှာတော့  အမေရိကန် ဒေါ်လာ ၃ ဒသမ ၇၉၁ ဘီလီယံဝင်ရောက်ခဲ့ပြီး ၂၂ ရာခိုင်နှုန်း လျော့ကျခဲ့ပါတယ်။

ပြီးခဲ့တဲ့ ၂၀၂၁-၂၀၂၂  ကြားကာလ ဘတ်ဂျက် ၆ လ မှာ ပြည်ပ ရင်းနှီးမြှုပ်နှံမှု ကန်ဒေါ်လာ သန်း ၆၄၀ ကျော်ပဲ ၀င်ရောက်ခဲ့ပြီး ဆယ်စုနှစ်အတွင်း ၀င်ရောက်မှုအနည်းဆုံး ဖြစ်ခဲ့ပါတယ်။

အခု ၂၀၂၂-၂၀၂၃ ဘဏ္ဍာနှစ် တစ်နှစ်ပြည့်မီဖို့ ၃ လအလိုမှာလည်း  ၁ ဒသမ ၄၆၂ ဘီလီယံသာ ဝင်ရောက်ထားတာ ဖြစ်ပါတယ်။

စစ်အာဏာသိမ်းမှုရဲ့ အကျိုးဆက် မတည်ငြိမ်မှု/မရေရာမှုတွေနဲ့ စိန်ခေါ်မှုတွေ များလာတာ၊ ဆုံးရှုံးနိုင်ခြေများပြီး အကျိုးအမြတ် ပြန်ရနိုင်ခြေနည်းနေတာတွေကြောင့်  နိုင်ငံခြားရင်းနှီးမြှုပ်နှံမှုလုပ်ငန်းတွေဟာ ပြန်လည်ထွက်ခွာတာ၊ အသစ်ဝင်ရောက်တာ နည်းနေတာလို့ မြန်မာ့စီးပွားရေး စောင့်ကြည့်သူတွေက သုံးသပ်ကြပါတယ်။

မြန်မာနိုင်ငံမှာ အာာဏာသိမ်းစစ်တပ် တာဝန်ယူထားတဲ့ ကာလအတွင်း ပြည်ပ ရင်းနှီးမြှုပ်နှံမူတွေကို ပြန်ကြည့်ရင် စွမ်းအင်ကဏ္ဍ၊ ကုန်လုပ်ထုတ်မှုကဏ္ဍနဲ့ ဝန်ဆောင်မှု ကဏ္ဍတွေမှာသာ အထိုက်အလျောက် ဝင်ရောက်မှုရှိခဲ့ပါတယ်။ ကျန်လုပ်ငန်းကဏ္ဍတွေမှာတော့ အနည်းငယ်ပဲ ဝင်ရောက်ခဲ့တာပါ။

အခုဘဏ္ဍာနှစ် ၉ လအတွင်းမှာလည်း စွမ်းအင်ကဏ္ဍကို အမေရိကန်ဒေါ်လာ သန်း ၈၀၀ ကျော်နဲ့ ရင်းနှီးမြှပ်နှံမှုပမာဏ အများဆုံးဝင်ရောက်ခဲ့ပြီး ဝန်ဆောင်မှုကဏ္ဍမှာ သန်း ၄၀၀ကျော်နဲ့ ဒုတိယ အများဆုံးဝင်ရောက်ခဲ့တာ တွေ့ရပါတယ်။

စင်ကာပူနိုင်ငံရဲ့ ရင်းနှီးမြှုပ်နှံမှုက အခုဘဏ္ဍာနှစ် ၉ လအတွင်းမှာ ကန်ဒေါ်လာ သန်း ၁ ဒသမ ၁၅၄ ဘီလီယံအထိ ရှိပါတယ်။ ဟောင်ကောင်က   ကန်ဒေါ်လာ ၁၆၅ သန်းကျော်နဲ့  မြန်မာနိုင်ငံမှာ ဒုတိယအများဆုံး ရင်းနှီးမြှုပ်နှံသူအဖြစ် ရပ်တည်နေတာပါ။

တရုတ်ရဲ့ ရင်းနှီးမြှုပ်နှံမှုကတော့ ကန်ဒေါ်လာ ၉၅ သန်းကျော်သာရှိပြီးတော့ တတိယနေရာမှာ ရပ်တည်နေပေမဲ့ တစ်နှစ်ထက် တစ်နှစ် ရင်းနှီးမြှုပ်နှံမှု ပမာဏ လျော့ကျလာတာ တွေ့ရပါတယ်။