အဆိပ်သင့်ဘက်တီးရီးယား ဖြစ်နိုင်ခြေရှိတာတွေကို တွေ့ခဲ့လို့ အာဂျင်တီးနားနိုင်ငံ ပလိတ်မြစ်ရေနဲ့ ဘယ်လိုမှမထိကြဖို့ လူတွေရော တိရစ္ဆာန်တွေပါ ရှောင်သင့်တယ်လို့ အရာရှိတယောက်က ဖေဖော်ဝါရီ ၈ ရက်မှာ သတိပေးလိုက်ပါတယ်။

ပလိတ်မြစ်ရဲ့ တောင်ဘက်ကမ်းရိုးတန်းနဲ့ တချို့ရေကန်တွေမှာ စိမ်းပြာရေညှိ ဒါမှမဟုတ် စီယာနိုဘက်တီးရီးယားတွေ ဖြစ်ထွန်းနေလို့ ဗျူးနော့စ်အေးရီးပြည်နယ် အစိုးရက လိမ္မော်ရောင်အဆင့် သတိပေးချက် ထုတ်ပြန်ထားပါတယ်။

စီယာနို ဘက်တီးရီးယားကို ရေထဲမှာ သဘာဝအတိုင်း တွေ့ရလေ့ရှိပေမဲ့ လေရောရေပါ လှုပ်ရှားမှုမရှိဘဲ ငြိမ်နေရင် ဖြစ်ထွန်းလာနိုင်တယ်လို့ အစိုးရအရာရှိ ဂွယ်လာမို ဂျေလင်စကီက ပြောပါတယ်။

ဒီဘက်တီးရီးယားဟာ အနုကြည့်မှန်ပြောင်းနဲ့ ကြည့်မှသာ မြင်နိုင်ပြီး ရေနဲ့ တခါတလေ မြေပြင်ပေါ်မှာ တွေ့ရတတ်ပါတယ်။

သူတို့အားလုံးက အဆိပ်ကိုထုတ်တာ မဟုတ်ပေမဲ့ ကမ္ဘာ့အပူချိန် မြင့်တက်လို့ ရာသီဥတု ပြောင်းလဲတဲ့အခါ အဆိပ်ထုတ်တဲ့မျိုးစိတ်က ပိုပြီး မကြာခဏ ပွားလာတယ်လို့ သိပ္ပံပညာရှင်တွေက ပြောပါတယ်။

ရေထဲမှာ စားသောက်ကုန် ထုတ်လုပ်ရာမှာသုံးတဲ့ ဖော့စ်ဖရပ်စ်နဲ့ နိုက်ထရိုဂျင်လို အစာတွေ အလွန်များလာတဲ့အခါမှာ စိမ်းပြာရေညှိ ဒါမှမဟုတ် စီယာနို ဘက်တီးရီးယားတွေ အဓိက ဖြစ်ထွန်းလာပါတယ်။

ရေမျက်နှာပြင်ပေါ်မှာ အစိမ်းရောင်အနည်တွေ မျောနေလို့ လေထဲကနေ ရှင်းရှင်းလင်းလင်း မြင်နိုင်တဲ့အတွက် ဘက်တီးရီးယားတွေ ရှိနေတာကို လွယ်လွယ်သိနိုင်ပါတယ်။

သူတို့ကိုထိမိရင် အရေပြား အင်ပြင်ထတာ၊ အပူလောင်တာ ဖြစ်နိုင်ပြီး ပင်လယ်ရေနဲ့အတူ မျိုချမိရင် ပြင်းထန်ဆိုးရွားတဲ့ အစာခြေမှုဆိုင်ရာ ပြဿနာတွေကို ဖြစ်စေနိုင်ပါတယ်။