အမေရိကန်စစ်တပ်က ရုရှားစစ်တပ်ရဲ့ ကျူးကျော်မှုကို တွန်းလှန်ဖို့ ယူကရိန်းနိုင်ငံကို ဒေါ်လာ ဘီလီယံချီ ထောက်ပံ့နေပေမယ့် အမေရိကန်စစ်တပ်ရဲ့ ထိပ်တန်း ဗျူဟာမြောက် ဦးစားပေးအဖြစ် တရုတ်နိုင်ငံကို ဖော်ထုတ်ပြသခဲ့ပါတယ်။

တရုတ်သမ္မတ ရှီကျင့်ဖျင်ဟာ တကိုယ်တော် အုပ်ချုပ်နေတဲ့ ထိုင်ဝမ်ကို ၂၀၂၇ ခုနှစ်မှာ ကျူးကျော်စစ်ဆင်နွှဲရေး အသင့်ပြင်ထားဖို့ သူ့စစ်တပ်ကို အမိန့်ပေးခဲ့ပြီးပြီလို့ အမေရိကန် ဗဟိုထောက်လှမ်းရေး အေဂျင်စီ CIA က ညွှန်ကြားရေးမှူး ဝီလျံ ဘန်းစ်က အမေရိကန် အစိုးရကို အရင်အပတ်က မြို့တော် ဝါရှင်တန်မှာ သတိပေးခဲ့ပါတယ်။

အမေရိကန်၊ ဗြိတိန်နဲ့ ဩစတြေးလျ တို့ရဲ့ သီတင်းပတ် ၃ ပတ်ကြာမယ့် အလံနီ ပူးတွဲစစ်ရေး လေ့ကျင့်ခန်းကို အမေရိကန်နိုင်ငံ နီဗားဒါးကန္တာရထဲမှာ ဖေဖော်ဝါရီ ၈ ရက်က ပူးတွဲ လေ့ကျင့်ခဲ့ကြပါတယ်။

တရုတ်တိုက်လေယာဉ်တွေနဲ့ လေကြောင်း ကာကွယ်ရေးစနစ်တွေကို ဆန့်ကျင်ဖို့ စွမ်းရည်မြင့် တိုက်ခိုက်မှု စစ်ဆင်ရေး အားထုတ်မှု အစိတ်အပိုင်းအနေနဲ့ လေ့ကျင့်နေကြတာပါ။

ဖေဖော်ဝါရီ ၈ ရက်က ဗြိတိန်ရဲ့ KC-2 ဗိုယေဂါ လောင်စာတင် လောင်စာဖြည့် လေယာဉ်က အမေရိကန်နဲ့ ဗြိတိန် တိုက်လေယာဉ်တွေကို လောင်စာဆီ ဖြည့်ပေးတဲ့ လေ့ကျင့်ခန်းကို ရိုက်တာ သတင်းဌာနက လိုက်ပါ သတင်းယူခဲ့ပါတယ်။

နှစ်စဉ်လေ့ကျင့်နေကျ စစ်ရေးလေ့ကျင့်မှုတွေဟာ လတ်တလောဖြစ်ရပ် ဘယ်ဟာနဲ့မှ မပတ်သက်ဘူးလို့ အလံနီ စစ်ရေးလေ့ကျင့်မှု မှာ ပါဝင်လေ့ကျင့်နေတဲ့ အမှတ် ၄၁၄ တိုက်ခိုက်မှု လေ့ကျင့်ရေး တပ်ခွဲရဲ့ တပ်မှူး အမေရိကန် လေတပ် ဗိုလ်မှူးကြီး ဂျရဒ် ဂျေ ဟတ်ချင်းဆန်က ပြောပါတယ်။

ဖေဖော်ဝါရီ ၁၁ ရက်က အမေရိကန် တိုက်လေယာဉ်တစီးဟာ တောင်ကာရို လိုင်းနား ပြည်နယ် ကမ်းရိုးတန်းမှာ တရုတ် သူလျှို မိုးပျံဘောလုံးလို့ သံသယရှိတဲ့ အရာကို ပစ်ချခဲ့လို့ တင်းမာမှု မြင့်တက်ခဲ့ပါတယ်။

စစ်ရေးလေ့ကျင့်မှုရဲ့ အဓိကအချက်က အမေရိကန်၊ ဗြိတိန် နဲ့ သြစတြေးလျတို့ ပစိဖိတ်ဒေသကို ဖြတ်ပြီး စစ်ဆင်ရေးဆောင်ရွက်ချိန်မှာ ဆန့်ကျင်ဘက်ဖြစ်မယ့် ကြီးမားတဲ့ အကွာအဝေးတွေကို ရည်ညွှန်းဖော်ထုတ်ခဲ့ပြီး သုံးနိုင်ငံ လေတပ်တွေ အပြန်အလှန် ပူးပေါင်းပြီး စစ်ဆင်ရေး ဆောင်ရွက်နိုင်စွမ်းကို မြှင့်တင် ပေးခဲ့ပါတယ်။