ထိုင်းနိုင်ငံ၊ ဘန်ကောက်၊ ဟွေ့ခွမ်နယ်မြေ၊ ဘန်ကပိမြို့၊ ကမ်ဖိုင်ဖစ် ၇ လမ်းထဲမှာ ဖေဖော်ဝါရီ ၁၂ ရက် ညနေပိုင်းက ဆောက်လက်စတိုက်ပြိုကျပြီး မြန်မာအပါအဝင် ရွှေ့ပြောင်းလုပ်သားတွေ ထိခိုက် ဒဏ်ရာရခဲ့တယ်လို့ သနေရှင်း ထိုင်းသတင်းမှာ ဖော်ပြပါတယ်။

အဆိုပါနေရာဟာ တိုက်ခန်းနဲ့ ရုံးခန်းတွေဖွင့်ဖို့ ဆောက်လုပ်နေတဲ့ဇုန်တခု ဖြစ်ပြီး ၅ လုံးမြောက် ဆောက်လက်စ ၄ ထပ်တိုက် ပြိုကျတာဖြစ်ကြောင်း၊ အဲဒီမှာ မြန်မာနဲ့ ကမ္ဘောဒီးယား ရွှေ့ပြောင်းလုပ်သား ၁၃၀ ကျော် အလုပ်လုပ်နေတယ်လို့  အလုပ်သမားတွေက သတင်းထောက်ကို ပြောပါတယ်။

တိုက်မပြိုခင်  သံဘားတန်းတချို့ ကွေးကျလာတာကို အလုပ်သမား ၁ ဦးကအောက်ကနေ လှမ်းမြင်လို့ အော်ဟစ်သတိပေးခဲ့ကြောင်း၊ ဒါကြောင့် အလုပ်သမားတွေ လုပ်လက်စ အလုပ်ပစ်ပြီး ထွက်ပြေးကြစဉ် အဆောက်အဦ ပြိုကျလာတာလို့ ဆိုပါတယ်။

ဟွေ့ခွမ်နယ်မြေရဲတပ်ဖွဲ့နဲ့ ကယ်ဆယ်ရေးအဖွဲ့တွေ ရောက်လာပြီး ဒဏ်ရာရသူ ပျောက်ဆုံးသူတွေ ရှာဖွေခဲ့ကြောင်း၊ ရွှေ့ပြောင်းလုပ်သား ၂ ဦး နဲ့ အလုပ်သမ ၃ ဦးတို့ ဒဏ်ရာရပြီး ဆေးရုံ ပို့ပေးခဲ့တယ်လို့  အလုပ်သမားကြီးကြပ်သူက ပြောပါတယ်။ 

ဆက်လက်ပြီး အပျက်အစီးအုတ်ပုံတွေကြားမှာ ပိနေသူတွေကို စက်ကိရိယာနဲ့ ရှာဖွေခဲ့ကြောင်း၊ စက်ထဲမှာ သက်ရှိ အသက်ရှူသံ လှုပ်ရှားညည်းတွား သံတစုံတရာမရှိသလို ပျောက်ဆုံး အလုပ်သမားတွေလည်း မရှိတော့တာကြောင့် အဲဒီညမှာပဲ ရှာဖွေရေးလုပ်ငန်း ရပ်စဲလိုက်ပါတယ်။ 

အဆိုပါဧရိယာတဝိုက်ကိုတော့ အန္တရာယ်ရှိ ကန့်သတ်နယ်မြေအဖြစ် တားဆီးထားပြီး ဆောက်လုပ်ရေးလုပ်ငန်းတွေလည်း ရက်အကန့်အသတ်မရှိ ခေတ္တရပ်နားထားရပါတယ်။

အဆိုပါဆောက်လုပ်ရေးလုပ်ငန်းဟာ ခွင့်ပြုချက်နဲ့ တရားဝင်ဆောင်ရွက်နေတာဖြစ်ပေမဲ့ အပေါ်ထပ်မှာ ဘိလပ်မြေအိတ်တွေကို ဖြန့်ကြက်မထားဘဲ တနေရာတည်း သွားပုံထားတာကြောင့်  ဝန်ပိပြီး ပြိုကျသွားတာလို့ ဘန်ကောက် သဘာဝဘေးအန္တရာယ်တားဆီးကာကွယ်ရေးနဲ့ ကယ်ဆယ်ရေးအဖွဲ့ တာဝန်ရှိသူက ပြောပါတယ်။

လောလောဆယ် တာဝန်ရှိသူတွေက သက်ဆိုင်ရာ အင်ဂျင်နီယာနဲ့ ဖိုမင် (အလုပ်ကြီးကြပ်သူ) တွေကို ခေါ်ယူစစ်ဆေးနေပြီး  လိုအပ်သလို အရေးယူဖို့ ပြင်ဆင်နေတယ်လို့  ဆိုပါတယ်။ 

ဖေဖော်ဝါရီလ ၁၄ ရက် နောက်ဆက်တွဲသတင်းအရ ဆေးရုံပေါ် တက်ရောက်ကုသနေတဲ့ ရွှေ့ပြောင်းလုပ်သား ၅ ဦးလုံး ကမ္ဘောဒီးယားအလုပ်သမားတွေဖြစ်ကာ ဆေးရုံကဆင်းလာကြပြီလို့ ထိုင်းသတင်းတွေမှာ ဖော်ပြပါတယ်။ 

ကိုးကား - nationtv.tv/bangkokbiznews