ထိုင်ဝမ်နဲ့ အမေရိကန်တို့ကြား တရားဝင်ဆက်သွယ်မှု ဘယ်လိုပုံစံကိုမဆို ပြတ်ပြတ်သားသား ဆန့်ကျင်ကြောင်း  တရုတ်နိုင်ငံခြားရေးဝန်ကြီးဌာနက ဖေဖော်ဝါရီ ၂၂ ရက်က ပြောလိုက်ပါတယ်။

ထိုင်ဝမ်အရေးမှာ ဝင်စွက်ဖက်နေတာကို ရပ်တန့်ဖို့၊ ထိုင်ဝမ်ရေလက်ကြားမှာ တင်းမာမှုအသစ်တွေ ဖန်တီးနေတာကိုလည်း ရပ်တန့်ဖို့ တိုက်တွန်းလိုက်တာပါ။

ထိုင်ဝမ်ရေလက်ကြားမှာ လက်ရှိရင်ဆိုင်နေရတဲ့ တင်းမာမှုအသစ်ဟာ အမေရိကန်ကြောင့် လွတ်လပ်ရေးရယူဖို့ ထိုင်ဝမ် DPP အာဏာပိုင်တွေရဲ့ အကြိမ်ကြိမ်ကြိုးပမ်းမှုတွေက အမြစ်တွယ်လို့ဖြစ်တယ်လို့  တရုတ်နိုင်ငံခြားရေးဝန်ကြီးဌာန ပြောရေးဆိုခွင့်ရှိသူ ဝန်ဝမ်ဘင်က ပေကျင်းသတင်းစာရှင်းလင်းပွဲမှာ ပြောပါတယ်။

ဒါဟာ အမေရိကန်ဘက်က လူတချို့ဟာ ထိုင်ဝမ်ကို အသုံးချပြီး တရုတ်ကိုထိန်းချုပ်ဖို့ ရည်ရွယ်ထားတာလို့လည်း စွပ်စွဲခဲ့ပါတယ်။

ဒီကိစ္စနဲ့ပတ်သက်လို့ အမေရိကန်ဘက်ကို တရုတ်နိုင်ငံက လေးနက်တဲ့ရပ်တည်မှုကို ရှင်းရှင်းလင်းလင်း ပြထားပြီးပြီလို့လည်း ဆိုပါတယ်။

ထိုင်ဝမ်လွတ်လပ်ရေးကို ထောက်ခံခြင်းမပြုဘဲ အမေရိကန်ခေါင်းဆောင်ပိုင်းက ကတိကဝတ် ပြုထားတဲ့ အမေရိကန်-တရုတ် ပူးတွဲကြေညာချက် ၃ ရပ်ပါ ပြဋ္ဌာန်းချက်တွေကို လိုက်နာဖို့ အမေရိကန်ဘက်ကို တိုက်တွန်းကြောင်းလည်း တရုတ်နိုင်ငံခြားရေးဝန်ကြီးဌာန ပြောခွင့်ရသူက ပြောပါတယ်။

ပင်တဂွန်ရဲ့ တရုတ်နိုင်ငံဆိုင်ရာ ထိပ်တန်းအရာရှိဖြစ်တဲ့ လက်ထောက်ကာကွယ်ရေးဝန်ကြီး မိုက်ကလ်ချေ့စ်ဟာ ပြီးခဲ့တဲ့သီတင်းပတ်က ထိုင်ဝမ်ကို ရောက်ရှိခဲ့ပါတယ်။

သီးခြားအားဖြင့် အိမ်ဖြူတော်ဟာ အခုသီတင်းပတ်အတွင်း ဝါရှင်တန်မှာ အကြီးတန်း ထိုင်ဝမ်အရာရှိတွေနဲ့ တွေ့ဆုံဆွေးနွေးမှာဖြစ်ပြီး တိုင်ပေနဲ့ ပေကျင်းကြား တင်းမာမှုတွေ မြင့်တက်လာချိန်မှာ တရုတ်နိုင်ငံရဲ့ ဒေါသတကြီးတုံ့ပြန်မှုကို ရှောင်ရှားဖို့ သီးသန့် လုပ်ဆောင်ပုံရကြောင်း Financial Times က ဖေဖော်ဝါရီ ၁၈ ရက်မှာ ဖော်ပြခဲ့ပါတယ်။

အမေရိကန်ဟာ နိုင်ငံအများစုလိုပဲ ထိုင်ဝမ်နဲ့ တရားဝင် သံတမန်ဆက်ဆံရေး မရှိပေမဲ့ ထိုင်ဝမ်ကျွန်းရဲ့ အရေးအကြီးဆုံး လက်နက်ထောက်ပံ့သူဖြစ်ပြီး သူတို့နှစ်နိုင်ငံဟာ လုံခြုံရေးအရ နီးကပ်တဲ့ဆက်ဆံရေး ရှိကြပါတယ်။