ယူကရိန်းမြို့တော် ကိယက်ဗ်၊ ဩဒက်ဆာမြို့က ပင်လယ်နက်ဆိပ်ကမ်းနဲ့ ခါခိဗ်မြို့တွေ အပါအဝင် ယူကရိန်းနိုင်ငံတဝန်းက မြို့တွေကို ရုရှားက ဒုံးကျည်တွေနဲ့ မတ် ၉ ရက် အစောပိုင်းမှာ တိုက်ခိုက်ခဲ့ပါတယ်။

ဒုံးကျည်တွေဟာ ယူကရိန်းအနောက်ဘက်က ဇိုင်တိုမြာ၊ ဗင်ညစ်ဇီယာနဲ့ ရိန်းဗ်မြို့တွေကနေ ယူကရိန်းအလယ်ပိုင်း ဒနစ်ပရိုနဲ့ ပိုလ်တာဗာအထိ မြို့တွေအပါအဝင် ကျယ်ပြန့်တဲ့ ပစ်မှတ်တွေကို ထိမှန်ခဲ့တယ်လို့ အရာရှိတွေက ပြောပါတယ်။

ကိယက်ဗ်မြို့တော်ဝန် ဗစ်တာလီ ကလစ်ချ်ကိုက မြို့တော်အနောက်တောင်ပိုင်းမှာ ပေါက်ကွဲမှုတွေဖြစ်ခဲ့ပြီး ကယ်ဆယ်ရေးလုပ်ငန်းတွေ လုပ်နေပြီလို့ ပြောပါတယ်။

လူအသေအပျောက်နဲ့ ပတ်သက်ပြီး ချက်ချင်းသတင်းထုတ်ပြန်တာ မရှိသေးသလို လျှပ်စစ်မီးပြတ်နေတယ်လို့လည်း ဒေသခံတချို့က ပြောပါတယ်။

ရုရှားက ဒုံးကျည်တွေနဲ့ အစုလိုက်အပြုံလိုက် ပစ်ခတ်တိုက်ခိုက်လို့ ဆိပ်ကမ်းမြို့က စွမ်းအင်သုံးစက်ရုံကို ထိမှန်ခဲ့ပြီး လျှပ်စစ်ဓာတ်အား ပြတ်တောက်သွားခဲ့တယ်လို့ ဩဒက်ဆာဒေသရဲ့ အုပ်ချုပ်ရေးမှူး မက်ခ်ဆင်မ် မာချန်ကိုက တယ်လီဂရမ် လူမှုကွန်ရက်ကနေ ပြောပါတယ်။

ခါခိဗ်ဒေသ အုပ်ချုပ်ရေးမှူး အိုလေး ဆိုင်ဟိုဘုံက ရုရှားရဲ့ ဒုံးကျည်နဲ့ တိုက်ခိုက်မှုကြောင့် သူ့မြို့နဲ့ ဒေသထဲမှာ အခြေခံအဆောက်အဦ အပါအဝင် ပစ်မှတ်တွေ ၁၅ ခု ထိမှန်ခဲ့တယ်လို့ ပြောပါတယ်။ ဒနစ်ပရိုမြို့ရဲ့ အလယ်ပိုင်းနဲ့ နိုင်ငံတဝန်း ဒေသတွေမှာလည်း တိုက်ခိုက်ခံခဲ့ရတယ်လို့ ဆိုပါတယ်။