ရုရှား Su-27 ဂျက်လေယာဉ်တစင်းဟာ မတ်လ ၁၄ ရက် မနက်ပိုင်းက နိုင်ငံတကာ လေပိုင်နက်ထဲမှာ ပျံသန်းနေတဲ့ အမေရိကန်စစ်တပ်သုံး MQ-9 ထောက်လှမ်းရေးဒရုန်းရဲ့ ပန်ကာကို ပစ်ခတ်ခဲ့ပြီးနောက် ဒရုန်းဟာ ပင်လယ်နက်ထဲကို ပျက်ကျသွားခဲ့တယ်လို့ ပင်တဂွန်စစ်ဌာနချုပ်က ပြောပါတယ်။

အဲဒီပြောကြားချက် ထွက်ပေါ်လာပြီးနောက် ရုရှားကာကွယ်ရေးဝန်ကြီးဌာနကလည်း အမေရိကန်ဒရုန်း ပျက်ကျသွားတာဟာ ရုရှားရဲ့ တိုက်လေယာဉ်တွေကြောင့် မဟုတ်ဘဲ ပြင်းပြင်းထန်ထန် လှုပ်ရှားမှုကြောင့် ပျက်ကျခဲ့တာဖြစ်ကြောင်း တုံ့ပြန်ထားပါတယ်။

ရုရှားတိုက်လေယာဉ်တွေဟာ သူတို့ရဲ့လေယာဉ်ပေါ်ရှိ လက်နက်တွေကို အသုံးလည်းမပြုခဲ့၊ အမေရိကန် MQ-9 ဒရုန်းနဲ့လည်း ထိတွေ့မှုမရှိဘဲ နိုင်ငံလေယာဉ်ကွင်းကို ဘေးကင်းလုံခြုံစွာ ပြန်ရောက်လာကြောင်း ကာကွယ်ရေးဝန်ကြီးဌာနက ပြောပါတယ်။

ပင်တဂွန်က ဒီဖြစ်ရပ်ဟာ ရုရှားက ယူကရိန်းကို ကျူးကျော်ပြီး တနှစ်ကျော်ကြာပြီးနောက်ပိုင်း ပထမဆုံးဖြစ်ရပ်လို့ ဆိုပါတယ်။

အမေရိကန်ပြည်ထောင်စုဆိုင်ရာ ရုရှားသံအမတ်ကြီး အနာတိုလီ အန်တိုနော့ဗ်ကို အမေရိကန် နိုင်ငံခြားရေးဌာနက ဆင့်ခေါ်ခဲ့ပြီးနောက်မှာ အန်တိုနော့ဗ်က ရုရှားဟာ ဒီဖြစ်ရပ်ကို ရန်စမှုတခုလို့ ရှုမြင်ကြောင်း ရုရှားနိုင်ငံပိုင် ရုပ်မြင်သံကြား သတင်းထောက်တွေကို ပြောထားပါတယ်။

ရုရှားနိုင်ငံက ဘာထိတွေ့မှုမှ မရှိခဲ့ကြောင်းနဲ့ ဒရုန်းဟာ လှုပ်ရှားရမှုများလွန်းပြီး ပျက်ကျသွားခဲ့တာဖြစ်ကြောင်း ရုရှားကာကွယ်ရေးဝန်ကြီးဌာနက ထုတ်ပြန်ထားတဲ့အတိုင်း တူညီစွာပဲ ပြောခဲ့တာပါ။

အန်တိုနော့ဗ်က နိုင်ငံခြားရေးဌာနမှာ တွေ့ဆုံမှုဟာ အပြုသဘောဆောင်ကြောင်း ပြောထားပြီး ဒီဖြစ်ရပ်အပေါ် ရုရှားအတွက် ဖြစ်နိုင်ခြေရှိတဲ့ အကျိုးဆက်တွေကိစ္စကို ထုတ်ဖော်ပြောကြားခြင်း မရှိခဲ့ကြောင်း RIA သတင်းဌာနက ဖော်ပြခဲ့ပါတယ်။

“ဆက်သွယ်ရေးလမ်းကြောင်းတွေ ဖွင့်ထားဖို့ အရေးကြီးတယ်လို့ ယုံကြည်ကြောင်း” သံရုံးက အန်တိုနော့ဗ်ရဲ့ ပြောကြားချက်ကို ကိုးကား ထုတ်ပြန်ထားပါတယ်။