မန်စီးတီး ဖလားသုံးလုံးရမယ့်အရေး မန်ယူပရိသတ်များ မစိုးရိမ်ရန် ဂွါဒီယိုလာ ပြော

မန်စီးတီးအသင်းဟာ အခုနှစ်ရာသီမှာ ဆုဖလား ၃ လုံးရမယ့်အရေးကို မန်ယူအသင်းပရိသတ်တွေအနေနဲ့ တွေးပူပြီး ကြောက်ရွံ့နေဖို့ မလိုအပ်ကြောင်း နည်းပြဂွါဒီယိုလာက ပြောပါတယ်။
မန်စီးတီးအသင်းဟာ အခုနှစ်ရာသီမှာ ပရီးမီးယားလိဂ်၊ ချန်ပီယံလိဂ်နဲ့ အက်ဖ်အေဖလားဆုဖလားသုံးလုံးရယူနိုင်ဖို့ နီးစပ်နေတာပါ။ အင်္ဂလန်ဘောလုံးသမိုင်းမှာ တစ်ရာသီအတွင်းမှာ အဓိကဆုဖလားသုံးလုံးရယူနိုင်တဲ့ အသင်းက မန်ယူအသင်းသာရှိခဲ့ဖူးပြီး ၁၉၉၉ ခုနှစ်က ရယူနိုင်ခဲ့တာပါ။
မန်စီးတီးသာ အသင်းသာ အဲဒီလို ဆုဖလားသုံးလုံးရယူနိုင်မယ်ဆိုရင် မန်ယူအသင်းရဲ့ အောင်မြင်မှုကို လုယူသွားလိမ့်မယ်ဆိုပြီး မန်ယူ အသင်းပရိသတ်တွေက စိုးရိမ်နေကြတာပါ။
နည်းပြဂွါဒီယိုလာက “ဒီကိစ္စအပေါ် စိုးရိမ်ကြောက်ရွံ့နေဖို့မလိုအပ်ပါဘူး။ ကျနော်တို့က အိမ်နီးနားချင်းတွေပါ။ အိမ်နီးနားချင်းတွေဆိုတာ တယောက်နဲ့တယောက် အမြဲတမ်း နှစ်လိုဖွယ်ကောင်းကြပါတယ်” လို့ အရွန်းဖောက်ခဲ့တာပါ။
တကယ်တမ်းမှာတော့ ဆုဖလား ၃ လုံးရယူနိုင်ဖို့က အဝေးကြီးလိုနေသေးပြီး လက်ရှိအချိန်မှာ ရယ်စရာတစ်ခုအဖြစ် သာရှိနေသေးကြောင်း နည်းပြဂွါဒီယိုလာကပြောသွားပါတယ်။
မန်ယူအသင်းကတော့ အခုနှစ်ရာသီမှာ ဖလားတလုံးရရှိထားပြီး အက်အေဖလားပြိုင်ပွဲမှာလည်း နောက်ဆုံး ဗိုလ်လုပွဲအဆင့်အထိ ရောက်ရှိနေပြီဖြစ်ပါတယ်။