တောင်ကိုရီးယား-အမေရိကန် မဟာမိတ်အဖွဲ့ဟာ ရှုပ်ထွေးတဲ့ အကျပ်အတည်းတွေကို အတူတကွကျော်လွှားဖို့ “အဆင့်သစ်ကို ခုန်တက်ရမယ်”လို့ တောင်ကိုရီးယားသမ္မတ ယွန်းဆွတ်ခ်ယိုးက ဧပြီ ၂၅ ရက်မှာ ပြောလိုက်ပါတယ်။

နှစ်နိုင်ငံ လုံခြုံရေးမဟာမိတ်ဟာ “ထောက်ပံ့ရေးကွင်းဆက်နဲ့ အနာဂတ်ကို ဦးတည်ပြီး ဆန်းသစ်တဲ့ နည်းပညာ မဟာမိတ်အဖြစ်ကို ပြောင်းလဲသင့်တယ်” လို့ ယွန်းက ပြောခဲ့တာပါ။

အမေရိကန်သမ္မတ ဂျိုးဘိုင်ဒင်နဲ့ ဝါရှင်တန် ထိပ်သီးဆွေးနွေးပွဲမတိုင်မီ တရက်အလိုမှာ အမေရိကန် ကုန်သည်ကြီးများအသင်းက ကျင်းပတဲ့ ပွဲတခုမှာ ပြောတာလည်း ဖြစ်ပါတယ်။

နှစ်နိုင်ငံစီးပွားရေးဟာ စိန်ခေါ်မှုအသစ်တွေနဲ့ ရင်ဆိုင်နေရပြီး စီးပွားရေးနှေးကွေးမှုဟာလည်း ရင်းနှီးမြှုပ်နှံမှုပတ်ဝန်းကျင်ကို အနှောင့်အယှက် ဖြစ်စေတယ်လို့ သူက ပြောခဲ့ပါတယ်။

“နည်းပညာဆိုင်ရာ ဖော်ညွှန်းမှုတွေအတွက် ပြိုင်ဆိုင်မှု၊ စွမ်းအင်ပြဿနာတွေနဲ့ ရာသီဥတု အကျပ်အတည်းတွေကြောင့် လုပ်ငန်းလုပ်ဆောင်မှုတွေ မသေချာ မရေရာတာတွေ တနေ့ထက်တနေ့ ပိုမိုများလာတယ်” လို့ ယွန်းက ပြောပါတယ်။

၁၉၆၅ ခုနှစ်မှာ တောင်ကိုရီးယားနဲ့ အမေရိကန် ကုမ္ပဏီတခုတို့ ပါဝင်တဲ့ ဖက်စပ်လုပ်ငန်းကနေ တောင်ကိုရီးယားဟာ မှတ်ဉာဏ်တပိုင်း လျှပ်ကူးပစ္စည်းထုတ်လုပ်မှုမှာ ကမ္ဘာလုံးဆိုင်ရာ ဦးဆောင်နိုင်ငံ ဖြစ်လာခဲ့ပြီး ကမ္ဘာ့စျေးကွက်ဝေစုရဲ့ ၆၀ ရာခိုင်နှုန်းအထိ မြင့်တက်လာခဲ့တယ်လို့ ယွန်းက ပြောပါတယ်။

အမေရိကန်နဲ့ တောင်ကိုရီးယားတို့ရဲ့ အဆင့်မြင့်ကုန်ထုတ်လုပ်မှု စွမ်းရည်တွေကနေ အဓိကနည်းပညာတွေဟာ နှစ်နိုင်ငံစလုံးအတွက် အကျိုးရှိစေမယ့် ကြီးမားတဲ့ ပူးပေါင်းဆောင်ရွက်မှုတွေကို ဖန်တီးနိုင်မယ်လို့လည်း ယွန်းက ပြောခဲ့ပါတယ်။