၂၀၂၃ ခုနှစ် ပထမ ၄ လပတ်အတွင်း မြန်မာနိုင်ငံမှာ ပြည်တွင်းစစ်ပြေး ဒုက္ခသည် အရေအတွက်ဟာ ၇ သိန်းနီးပါးထိ စံချိန်တင် တိုးလာခဲ့တယ်လို့ ISP Myanmar က ထုတ်ပြန်ပါတယ်။

ဒါဟာ စစ်အာဏာသိမ်းမှုအလွန် အခုနှစ် ဧပြီ ၂၀ ရက်အထိ ကောက်ယူရရှိတဲ့ စာရင်းတွေအရ ထုတ်ပြန်ထားတာဖြစ်ကာ အခု ၂၀၂၃ ခုနှစ်အတွင်းမှာတော့ လက်နက်ကိုင်ပဋိပက္ခတွေ ပိုမို ပြင်းထန်လာတာနဲ့အမျှ စစ်ပြေးရှောင်အရေအတွက်လည်းတိုးလာခဲ့တယ်လို့ ဆိုပါတယ်။

အခုနှစ် ပထမ ၄ လပတ်အတွင်း နိုင်ငံတဝန်း စစ်ပြေးဒုက္ခသည် ၆၈၂,၃၄၄ ယောက် ထက်မနည်း တိုးလာခဲ့ပြီးတော့ ဒီအရေအတွက်ဟာ အာဏာသိမ်းမှုအလွန် တိုးလာတဲ့ စစ်ပြေးဒုက္ခသည် စုစုပေါင်းရဲ့  ၄ ပုံ ၁ ပုံကျော်အထိ ရှိခဲ့တယ်လို့ ISP Myanmar က ပြောပါတယ်။

အာဏာသိမ်းမှုအလွန် အများဆုံး စစ်ပြေးတိမ်းရှောင်နေရတဲ့ ဒေသကတော့ ဒုက္ခသည် ၁ ဒသမ ၃ သန်းကျော်နဲ့ စစ်ကိုင်းတိုင်းဖြစ်ပြီး သူ့နောက်မှာတော့ မကွေးတိုင်းက ဒုတိယအများဆုံးဖြစ်ကာ ကယားပြည်နယ်ကတော့ တတိယအများဆုံး ဖြစ်ပါတယ်။

လက်နက်ကိုင်ပဋိပက္ခဖြစ်စဉ်တွေကြောင့် ပြည်တွင်းစစ်ပြေးဒုက္ခသည်အရေအတွက် ၂ ဒသမ ၇ သန်းထက်မနည်း တိုးလာခဲ့ကာ အာဏာမသိမ်းမီကာလကတည်းက ပြည်တွင်း စစ်ပြေးဒုက္ခသည် အရေအတွက်ကတော့ ၄၉၇,၂၀၀ ယောက်ထက်မနည်း ရှိခဲ့တာကြောင့် ကာလနှစ်ရပ်ပေါင်း ပြည်တွင်းစစ်ပြေးဒုက္ခသည်စုစုပေါင်းကတော့ ၃ သန်းကျော် ရှိလာ နေတာပါ။

ဒါ့အပြင် ရိုဟင်ဂျာတွေအပါအဝင် ဒုက္ခသည် ၁ သန်းထက်မနည်းဟာလည်း နယ်စပ် ဖြတ်ကျော် ထွက်ပြေးခဲ့ရတဲ့ ဒုက္ခသည်တွေအနေနဲ့ ရှိနေတယ်လို့ ISP Myanmar က ပြော ပါတယ်။

စစ်ကောင်စီက စစ်အုပ်ချုပ်ရေး ကြေညာထားတဲ့ မြို့နယ်တွေထဲက ၁၆ မြို့နယ်မှာလည်း စစ်ပြေးဒုက္ခသည်တွေ တိုးလာခဲ့ကာ အခုနှစ် ဖေဖော်ဝါရီ ၁ ရက်ကနေ ဧပြီ ၂၀ ရက် အတွင်း အဲ့ဒီမြို့နယ်တွေမှာ စစ်ပြေးဒုက္ခသည် ၃ သိန်းခွဲကျော် တိုးလာခဲ့ပြီး အဲ့ဒီ အထဲက စစ်ကိုင်းတိုင်း၊ ခင်ဦးမြို့နယ်မှာ စစ်ပြေးဒုက္ခသည် ၁ သိန်း ၂ သောင်းကျော်နဲ့ အများဆုံး တိုးလာခဲ့တယ်လို့ ISP Myanmar က ထုတ်ပြန်ထားပါတယ်။