တရုတ်နိုင်ငံအပေါ် ထားရှိတဲ့ အမေရိကန်ရဲ့ မူဝါဒဟာ ပြောင်းလဲခြင်းမရှိကြောင်းနဲ့ နိုင်ငံခြားရေးဝန်ကြီး အန်တိုနီဘလင်ကန်ဟာ အခြေအနေတွေ ခွင့်ပြုရင် သူ့ရဲ့ တရုတ်ခရီးစဉ်ကို ပြန်စီစဉ်ဖို့ရှိကြောင်း အမေရိကန် နိုင်ငံခြားရေးဝန်ကြီးဌာနက မေ ၈ ရက်မှာ ပြောကြားခဲ့ပါတယ်။

တရုတ်နိုင်ငံခြားရေးဝန်ကြီး ချင်ဂန်းက  “မှားယွင်းတဲ့ အပြောအဆိုတွေနဲ့ လုပ်ရပ်တွေ တသီတတန်းကြီး ဆက်တိုက်ဖြစ်လာခဲ့ပြီး နက်နက်ရှိုင်းရှိုင်း ဆက်ဆံရေး အေးခဲလာခဲ့ပြီးနောက်မှာ တရုတ်-အမေရိကန် ဆက်ဆံရေးကို တည်ငြိမ်အောင် ထိန်းထားဖို့ အရေးကြီးတယ်” လို့ တရုတ်-အမေရိကန် ဆက်ဆံရေးနဲ့ ပတ်သက်ပြီး မှတ်ချက်ပေးပြီးနောက်မှာ ဌာနရဲ့ လက်ထောက်ပြောရေးဆိုခွင့်ရှိသူ ဗီးဒန့် ပတဲလ်က သတင်းထောက်တွေကို ပြောလိုက်တာပါ။

ပေကျင်းမြို့မှာ အမေရိကန်သံအမတ်ကြီး နိကိုလပ်စ်ဘန်းစ်နဲ့ တွေ့ဆုံချိန်မှာ တရုတ်နိုင်ငံခြားရေးဝန်ကြီး ချင်ဂန်းက အမေရိကန်အနေနဲ့ ထိုင်ဝမ်အရေးကို ကိုင်တွယ် ဖြေရှင်းရမှာဖြစ်ပြီး “တရုတ်တပြည်တည်း” မူဝါဒမှ ရုန်းထွက်ခြင်းကို ရပ်တန့်လိုက်ဖို့ကို အထူးအလေးပေး ပြောကြားခဲ့ပါတယ်။

မနှစ်က အောက်လွှတ်တော်ဥက္ကဋ္ဌ နန်စီပေလိုစီဟာ တရုတ်က သူ့အပိုင်လို့ ပြောနေတဲ့ ဒီမိုကရေစီနည်းကျ အုပ်ချုပ်တဲ့ ထိုင်ဝမ်ကျွန်းကို တရားဝင်ခရီးစဉ် လာရောက်ခဲ့ချိန်မှာ တရုတ်က အကြီးအကျယ် ဒေါသထွက်ခဲ့ပြီး ကမ္ဘာ့စီးပွားရေး အင်အားအကြီးဆုံး နှစ်နိုင်ငံကြား ဆက်ဆံရေးလည်း ကျဆင်းသွားခဲ့တာ ဖြစ်ပါတယ်။