ကရင်ပြည်နယ်၊ မြဝတီမြို့တွင်းမှာ ဇွန်လ ၂၇ ရက် ညပိုင်းက ဗုံးပေါက်ကွဲမှု ၄ ကြိမ်  ဖြစ်ပွားခဲ့ပါတယ်။ 

မြန်မာ-ထိုင်းနယ်စပ် မြဝတီမြို့မှာ မြို့တွင်းလုံခြုံရေးအတွက် ရဲနဲ့ စစ်တပ် တို့က  လုံခြုံရေးတင်းကျပ်တဲ့ကြားက  ခရိုင်အထွေထွေအုပ်ချုပ်ရေးမှူးရုံးအနီးမှာ မနေ့ည ၇ နာရီ ကျော်လောက်က ဗုံးပေါက်ကွဲမှု ဖြစ်ခဲ့တာပါ။ 

 ည ၇ နာရီ မိနစ် ၄၀ မှာပေါက်ကွဲမှု တစ်ကြိမ်ဖြစ်ပြီး၊  ည ၉ နာရီ ခွဲလောက်မှာတစ်ကြိမ်၊  ည ၁၁ နာရီလောက်မှာ တစ်ကြိမ်နဲ့ ည ၁၂ နာရီအချိန်မှာ တစ်ကြိမ်ထပ်မှန်ဖြစ်ပွားခဲ့တာပါ။  အဆိုပါ ပေါက်ကွဲမှုတွေမှာ လူထိခိုက် ဒဏ်ရာရတာတော့ မရှိဘူးလို့ သိရပါတယ်။ 

ညမထွက်ရအမိန့်ထုတ်ပြန်ထားတဲ့ မြဝတီမြို့မှာ မနေ့ကအထိတော့ ဗုံးပေါက်ကွဲမှု ၁၀ ကြိမ်ထက်မနည်း ဖြစ်ပွားခဲ့ပါတယ်။