၂၀၁၅ အီရန်နျူကလီးယား သဘောတူညီချက်ကို ပြန်အသက်သွင်းဖို့ အီရန်နဲ့ ကမ္ဘာ့ အင်အားကြီး နိုင်ငံတွေကြားက ဆွေးနွေးပွဲတွေ အောင်အောင်မြင်မြင်ပြီးစီးပါက ယီမင်နိုင်ငံထဲက အီရန်ရဲ့ သြဇာနဲ့ ပတ်သက်ပြီး ဆက်ဆွေးနွေးနိုင်မယ်လို့ ဂျာမနီ နိုင်ငံခြားရေးဝန်ကြီး ဟိုက်ခို မားစ်က ဇွန်လ ၃၀ ရက်မှာ ပြောလိုက်ပါတယ်။

ဒီလိုဆွေးနွေးနိုင်ပါက ယီမင်ပဋိပက္ခကိုပါ ဖြေရှင်းရာမှာ အထောက်အကူ ပြုလိမ့်မယ်လို့လည်း ဟိုက်ခိုမားစ်က ယီမင်နိုင်ငံခြားရေးဝန်ကြီးနဲ့ ပူးတွဲသတင်းစာရှင်းလင်းပွဲအတွင်း သတင်းထောက်တွေကို ဂျာမနီမြို့တော် ဘာလင်မှာ ပြောခဲ့တာပါ။

 ဆွေးနွေးပွဲတွေဟာ အီရန်ရဲ့ ဒေသတွင်း အခန်းကဏ္ဍနဲ့ ယီမင်နိုင်ငံထဲက ဟူသီတပ်တွေကို ထောက်ပံ့မှုရယ် သြဇာအာဏာတွေရယ်နဲ့ ပတ်သက်ပြီး အများကြီး ပိုဆွေးနွေးနိုင်စေဖို့ မရှိမဖြစ် လိုအပ်ချက်ပဲလို့လည်း မားစ်က ဆက်ပြောပါတယ်။

 အရင်အပတ်က ယီမင်နိုင်ငံမှာ နိုင်ငံတကာ အသိအမှတ်ပြုအစိုးရရဲ့ နောက်ဆုံး မြောက်ပိုင်းခြေကုပ်ဖြစ်တဲ့ မာရိဘ်ဒေသမှာ တိုက်ပွဲတွေ ပြင်းထန်ခဲ့တယ်လို့ သတင်းရင်းမြစ် ၃ ခုက ပြောပါတယ်။

 အဲဒီအချိန်မှာ ငြိမ်းချမ်းရေး ဆွေးနွေးကြဖို့ အမေရိကန်နဲ့ ကုလသမဂ္ဂက တွန်းအားပေး ခဲ့ရပါတယ်။.