ကိုဗစ်-၁၉ ကပ်ရောဂါကို ကျော်လွှားဖို့ တောင်ကိုရီးယားအစိုးရဟာ အာဆီယံနဲ့ လက်တွဲ ဆောင်ရွက်သွားမယ်လို့ တောင်ကိုရီးယား နိုင်ငံခြားရေးဝန်ကြီး ချွန်းအွီယွန်းက  သြဂုတ် ၃ ရက်နေ့ အာဆီယံဝန်ကြီးများအဆင့် အွန်လိုင်းအစည်းအဝေးအတွင်း ပြောလိုက်တာပါ။

ကိုဗစ်-၁၉ ကပ်ရောဂါ တိုက်ဖျက်ရေးကို တကမ္ဘာလုံးက အားကောင်းကောင်းသွေးစည်းပြီး ပူးပေါင်းဆောင်ရွက်ကြဖို့ကိုလည်း သူက တိုက်တွန်းပါတယ်။

ချွန်းက “ကပ်ဘေးကို ကျော်လွှားဖို့နဲ့ ပိုကောင်းတဲ့အနာဂတ်ကို ဖန်တီးဖို့ ကိုရီးယား ပြည်သူ့သမ္မတနိုင်ငံဟာ တောင်ပိုင်းမူဝါဒအသစ်မှာ ချမှတ်ထားတဲ့ ထိပ်တန်းဦးစားပေးတွေထဲမှာ အပြည့်အဝ ရင်းနှီးမြှုပ်နှံရင်း အာဆီယံအဖွဲ့ဝင်တွေနဲ့အတူ ဆောင်ရွက်သွားမယ်။ တောင်ကိုရီးယားရဲ့ တောင်ပိုင်း မူဝါဒသစ်ဟာ အာဆီယံရဲ့ အားလုံး ပြန်လည်နာလန်ထူရေး မူဘောင်ထဲက ရည်ရွယ်ချက်တွေနဲ့ လိုက်လျောညီထွေ ဖြစ်တယ်”လို့ ပြောပါတယ်။

ချွန်းဟာ အာဆီယံနဲ့ မိတ်ဖက်သုံးဖော် အစည်းအဝေးနဲ့ အာဆီယံဒေသတွင်း ဖိုရမ်တွေ အပါအဝင် ဒီသီတင်းပတ်ထဲမှာ ကျင်းပမယ့် အွန်လိုင်းအာဆီယံအစည်းအဝေးတွေကို တရုတ်၊ ဂျပန်တို့နဲ့အတူ တက်ရောက်ဖို့ စီစဉ်ထားပါတယ်။

အာဆီယံဒေသတွင်း ဖိုရမ်ကိုတော့ မြောက်ကိုရီးယားပါ ပါဝင်တက်ရောက်ကောင်း တက်ရောက် နိုင်တယ်လို့ ရိုက်တာသတင်းမှာ ဖော်ပြထားပါတယ်။