ပီအက်စ်ဂျီအသင်းမှာ ချန်ပီယံလိဂ်ဆုဖလား ရနံ့ရနေပြီဖြစ်ကြောင်း ကစားသမားဟောင်း ရော်နယ်ဒင်ဟိုက အရွှန်းဖောက်ပြီး ပြောပါတယ်။ 

မက်ဆီ ပီအက်စ်ဂျီအသင်းဆီကို ပြောင်းရွှေ့ခဲ့ပြီးနောက် တွစ်တာကနေတစ်ဆင့် ရော်နယ်ဒင်ဟိုက မှတ်ချက်ပေးရေးသားခဲ့တာပါ။ 

ဘရာဇီးဂန္ထဝင်တိုက်စစ်မှူး ရော်နယ်ဒင်ဟိုဟာ ဘာစီလိုနာနဲ့ ပီအက်စ်ဂျီအသင်းတွေမှာ ကစားခဲ့ဖူးပြီး မက်ဆီကို ပီအက်စ်ဂျီ ဂျာစီနဲ့ မြင်တွေ့ရတာ ပျော်ရွှင်မိတယ်လို့ ပြောပါတယ်။ 

မက်ဆီအပြင် မိတ်ဆွေဟောင်း ဆာဂျီယိုရာမို့စ်ဟာလည်း ပီအက်စ်ဂျီမှာရှိနေတာကြောင့် ချန်ပီယံလိဂ်ဆုဖလားရနံ့ ရရှိနေပြီဖြစ်တယ်လို့ တွစ်တာမှာ ဟာသနှောပြီး ရော်နယ်ဒင်ဟိုကရေ းသားခဲ့တာပါ။ 

“ဘာစီလိုနာနဲ့ ပီအက်စ်ဂျီ အသင်းတွေမှာကစားခဲ့ရတာက ဂုဏ်ယူစရာဖြစ်ပြီး ခုတော့ ကျနော့်သူငယ်ချင်း မက်ဆီကိုလည်း ဒီဂျာစီနဲ့ မြင်တွေ့နေရပါပြီ။ လီယွန်အနေနဲ့ ပဲရစ်မှာ ပျော်ရွှင်မှုတွေ အများကြီးရရှိနိုင်ပါစေ။ ကျနော့် မိတ်ဆွေကြီး ရာမို့စ်ရှိနေတာကိုလည်း ပျော်ရွှင်ပြီး စူပါကြယ်ပွင့်တစ်ယောက်လည်း ရှိနေပြီ။ ချန်ပီယံအနံ့တော့ရနေပြီ” လို့ တွစ်တာမှာ ရော်နယ်ဒင်ဟိုက ရေးတင်ခဲ့တာ ဖြစ်ပါတယ်။ 

ပြင်သစ်ထိပ်သီး ပီအက်စ်ဂျီအသင်းဟာ ၂၀၁၉-၂၀၂၀ ဥရောချန်ပီယံလိဂ်မှာ ဗိုလ်လုပွဲတစ်ကြိမ် ရောက်ဖူးပေမယ့် ချန်ပီယံတစ်ကြိမ်မှ မဖြစ်ဖူးသေးတာ ဖြစ်ပါတယ်။