အာဂျင်တီးနားတိုက်စစ်မှူး လီယိုနယ်မက်ဆီဟာ ပြင်သစ် PSG အသင်းနဲ့ ဩဂုတ် ၁၀ ရက်နေ့မှာ  ၂ နှစ် စာချုပ် သဘောတူ ချုပ်ဆိုလိုက်ပါတယ်။ 

အသက် ၃၄ နှစ်အရွယ်တိုက်စစ်မှူးဟာ စပိန်ထိပ်သီး ဘာစီလိုနာကနေ ထွက်ခွာပြီးနောက် အလွတ်ပြောင်းရွှေ့ကြေးနဲ့  PSG အသင်းကိုပြောင်းလာတာပါ။ 

“ပဲရစ်မှာ ကျနော့်ရဲ့ဘောလုံးကစားသမားဘဝသစ်စတင်ဖို့ စိတ်အားထက်သန်နေတယ်။ ကလပ် (PSG) အသင်းနဲ့ အသင်းရဲ့ မျှော်မှန်းချက်နဲ့ ကျနော့်ရဲ့ ရည်ရွယ်ချက်ကတော့ အကိုက်ပဲ” လို့ မက်ဆီက လက်မှတ်ရေးထိုးအပြီး သတင်းစာရှင်းလင်ပွဲမှာ  ပြောပါတယ်။ 

“ပီအက်စ်ဂျီအသင်းသားတွေနဲ့ ဝန်ထမ်းတွေဟာ ဘယ်လောက် ပင်ကိုစွမ်းရည် ပါရမီပြည့်ဝကြတယ်ဆိုတာ ကျနော် သိပါတယ်၊ သူတို့နဲ့အတူ အသင်းနဲ့ အသင်းပရိသတ်တွေအတွက်  ထူးကဲတဲ့အောင်မြင်မှုတခုခုရအောင် လုပ်မယ်လို့ စိတ်ပိုင်းဖြတ်ထားပါတယ်”လို့လည်း မက်ဆီက ပြောပါတယ်။

PSG အသင်း ဥက္ကဋ္ဌ နာဆာအယ်လ်ခလီဖာကတော့ မက်ဆီဟာ PSG အသင်းနဲ့ ပူးပေါင်းဖို့ ရွေးချယ်လိုက်တဲ့အတွက် ပျော်ရွှင်ဝမ်းမြောက်ဝမ်းသာဖြစ်တဲ့အကြောင်းနဲ့ မက်ဆီနဲ့ မိသားစုကို ပဲရစ်ကနေ ဂုဏ်ယူဝမ်းမြောက်စွာ ကြိုဆိုတယ်လို့ ပြောပါတယ်။

“မက်ဆီကလည်း အဆင့်အမြင့်ဆုံးနဲ့ ဆုဖလားတွေ ဆက်ယူဖို့ ဆန္ဒရှိနေတယ်လို့ ဖုံးကွယ်မထားဘဲ ပြောထားပြီးဖြစ်တယ်။ ဒါဟာ အသင်းရဲ့ ရည်မှန်းချက်နဲ့လည်း ထပ်တူပါပဲ” လို့ လည်း PSG အသင်း ဥက္ကဋ္ဌက ပြောပါတယ်။ မက်ဆီဟာ အသက် ၁၃ နှစ်အရွယ်ကတည်းက ဘာစီလိုနာကလပ်အသင်းမှာ ကစားခဲ့တာဖြစ်ပြီး ပွဲပေါင်း ၇၇၈ ပွဲကစားပြီး ၆၇၂ ဂိုး သွင်းယူထားခဲ့ကာ ဆုဖလားပေါင်း ၃၅ ခု ရယူပေးခဲ့သလို ကိုယ်တိုင်လည်း Ballon d'Or ကမ္ဘာ့အကောင်းဆုံးဘောလုံးသမားဆု ၆ ကြိမ််ရရှိခဲ့ပါတယ်။