တနင်္ဂနွေနေ့ ကစားမယ့် လန်ဒန်ဒါဘီပွဲစဉ်မှာ အာဆင်နယ်အသင်းဘက်က မခံချင်စိတ်နဲ့ ကြိုးစား ယှဉ်ပြိုင်လာလိမ့်မယ်လို့ ချဲလ်ဆီးနည်းပြ တူချယ်က ပြောပါတယ်။ 

အာဆင်နယ်အသင်းဟာ အဖွင့်ပွဲစဉ်မှာ ဘရန့်ဖို့ဒ်အသင်းကို ရှုံးနိမ့်ခဲ့တာကြောင့် ချဲလ်ဆီးနဲ့ ပွဲစဉ်မှာ နိုင်ပွဲရဖို့ လိုအပ်နေတာပါ။ 

အာဆင်နယ်အသင်းဟာ ကိုဗစ်-၁၉ ရောဂါပျံ့နှံ့မှုဒဏ်ကို ခံစားနေရပြီး အဖွင့်ပွဲစဉ်မှာ တိုက်စစ်မှူးတွေ မပါဝင်လို့ ခက်ခဲခဲ့တယ်လို့ နည်းပြတူချယ်က ပြောပါတယ်။ 

အာဆင်နယ်အသင်းဘက်ကနေ ခံစားကြည့်မယ်ဆိုရင် အောက်အသင်းတစ်သင်းအနေနဲ့ မခံချင်စိတ်ထည့်ပြီး ကြိုးစားယှဉ်ပြိုင်လာမှာကို သိကြောင်း နည်းပြတူချယ်က ပြောပါတယ်။ 

အဲဒီလို ရုန်းကန်လာမှုတွေအတွက်လည်း ချဲလ်ဆီးအသင်းဘက်က သတိရှိရှိနဲ့ ရင်ဆိုင်သွားရမယ်လို့ ဆိုပါတယ်။ 

ဒါ့အပြင် တိုက်စစ်မှူးသစ် လူကာကူဟာလည်း အာဆင်နယ်နဲ့ ကစားမယ့် လူစာရင်းမှာ ပါဝင်လာမှာဖြစ်ပြီး သွင်းဂိုးတွေ ပိုမိုရရှိဖို့အတွက် ခေါ်ယူခဲ့တာဖြစ်တယ်လို့ နည်းပြတူချယ်က ပြောပါတယ်။ 

အာဆင်နယ်အသင်းမှာ ကိုဗစ်-၁၉ ရောဂါ ကူးစက်ခံခဲ့ရတဲ့ လာကာဇက်နဲ့ ဝီလီယံတို့ ဆက်လက်လွဲချော်မှာဖြစ်ပြီး အူဘာမီယန်းကတော့ ပြန်လည်ပါဝင်လာနိုင်တယ်လို့ အာဆင်နယ်ဘက်က သတင်းထုတ်ပြန်ထားပါတယ်။