စစ်ကိုင်းတိုင်း၊ ကောလင်းမြို့နယ်၊ တောင်မော်ကျေးရွာမှာ နိုဝင်ဘာ ၃ရက်  မွန်းလွဲပိုင်းက   အထက်တန်းပြ ကျောင်းဆရာ တယောက် အပါအဝင်ပြည်သူ ၄ ယောက် အသတ်ခံခဲ့ရကြောင်း ဒေသခံတွေထံက သိရပါတယ်။

သတ်ဖြတ်ခံထားရသူတွေကတော့ အလယ်တန်းပြကျောင်းဆရာ ဦးဝေမင်းသူ၊ ကိုအောင်ကြည်လွင်၊ ကိုအောင်နိုင်ဝင်းနဲ့ ကိုဖိုးလပြည့် (ခ)ကျော်လင်းအောင်တို့ဖြစ်ကြပါတယ်။

“ဒလန်လက်ညှိုးထိုးတဲ့အိမ်၊ မသင်္ကာတဲ့အိမ် ဝင်ဖမ်း၊ နှိပ်စက်သတ်ဖြတ်တာပဲ။ နေ့လယ်လောက်က ဖြစ်တာ ညနေပိုင်းမှ ဘယ်သူသေတယ်ဆိုတာ သိရတာ။ လူငယ်ပိုင်းသုံးဦးနဲ့ လူကြီး တဦး ၄ ဦး၊ ကျောင်းဆရာအပါအဝင်ပေါ့ " လို့ ဒေသခံတစ်ဦးက  ပြောပါတယ်။

တောင်မော်ကျေးရွာမှာ   နိုဝင်ဘာလ ၂ ရက်နေ့ကတည်းက  စစ်ကောင်စီတပ်တွေက ကောလင်းကနေ  စစ်ကား ၇ စီးနဲ့ ရောက်ရှိလာပြီး တပ်စွဲထားတယ်လို့လည်း ဒေသခံတွေဆီကသိရပါတယ်။

တောင်မော်ကျေးရွာဟာ  ကောလင်းမြို့နယ်၊ အရှေ့ဘက် ၈ မိုင် အကွာမှာတည်ရှိပြီး ကျေးရွာရှိ ပြည်သူတချို့ နေရပ်စွန့်ခွာ ထွက်ပြေးတိမ်းရှောင်နေကြရပါတယ်။