မြိတ်-ထားဝယ်ခရိုင် ကေအန်ယူ တပ်မဟာ ၄ ထိန်းချုပ်နယ်မြေအတွင်း   နိုဝင်ဘာ ၈ ရက်က  စစ်ကောင်စီလက်အောက်ခံ  ခလရ (၂၈၅) တပ်နဲ့  ကရင်အမျိုးသား လွတ်မြောက်ရေးတပ်မတော်(KNLA) တို့  တိုက်ပွဲဖြစ်ပွားခဲ့တယ်လို့   ကေအန်ယူဗဟိုက ထုတ်ပြန်ထားပါတယ်။

စစ်ကောင်စီတပ်မှ  မုတောကျေးရွာအတွင်း ၂ ကြိမ်ဝင်ရောက်ပြီး စစ်ရေးလှုပ်ရှားမှု ပြုလုပ်တာကြောင့် တိုက်ပွဲဖြစ်ပွားခဲ့လို့ ဒေသခံ ရွာသူရွာသားတွေ တိမ်းရှောင်နေခဲ့ကြရတယ်လို့ ဆိုပါတယ်။ 

အဆိုပါတိုက်ပွဲကြောင့် နှစ်ဘက်ထိခိုက်သေဆုံး ဒဏ်ရာရမှု အခြေအနေကိုတော့ မသိရပါဘူး။ တိုက်ပွဲအပြီးမှာ ခလရ (၂၈၅) စစ်တပ်က ဒေသတွင်း  ခဲတွင်းတူးဖော်ရေးလုပ်ငန်း လုပ်သူတယောက်ထံကနေ  ငွေကျပ်သိန်း ၁၅၀  အဓမ္မတောင်းယူခဲ့တယ်လို့လည်း ကေအန်ယူက ပြောပါတယ်။

ကေအန်ယူထိန်းချုပ်နယ်မြေအတွင်းမှာ ပြီးခဲ့တဲ့ အောက်တိုဘာလအတွင်းက  စစ်ကောင်စီလက်အောက်ခံတပ်နဲ့ တိုက်ပွဲပေါင်း  ၂၇၅ အကြိမ်အထိ  ထိတွေ့တိုက်ပွဲတွေ ဖြစ်ပွားခဲ့တယ်လို့  ကေအန်ယူဗဟိုက  ထုတ်ပြန်ထားပါတယ်။

မြန်မာနိုင်ငံရဲ့ တောင်ပိုင်းဒေသဖြစ်တဲ့  ပဲခူး၊ မွန်၊  ကရင်၊ တနင်္သာရီတိုင်းဒေသအတွင်းမှာ စစ်ဘေးဒုက္ခသည်ပေါင်း ၁၁၃,၄၀၀ လောက်ရှိနေပြီး ကျန်းမာရေးနဲ့ ရာသီဥတုဒဏ်တွေပါ ခံစားနေရကာ အစားအစာနဲ့ အရေးပေါ်အကူအညီတွေ လိုအပ်နေပါတယ်။