ယီမင်မြို့တော် ဆာနားရှိ အမေရိကန်သံရုံးခြံဝင်းအတွင်းထဲကို ဟူသီပြည်သူ့စစ်အဖွဲ့တွေ ဝင်ရောက်စီးနင်းခဲ့တယ်ဆိုတဲ့ သတင်းတွေကို ဟူသီအကြီးတန်းအရာရှိတွေက ငြင်းဆိုခဲ့ပါတယ်။ 

အမေရိကန်သံရုံးဝန်ထမ်းတွေ ဖမ်းဆီးထိန်းသိမ်းခံရခြင်း ရှိ၊ မရှိနဲ့ ပတ်သက်ပြီး အတည်ပြုခြင်း၊ ငြင်းဆိုခြင်း မပြုဘဲ တရုတ်မီဒီယာအုပ်စု (CMG) နဲ့ ဖုန်းအင်တာဗျူးတွေမှာ စစ်တပ်အရာရှိတွေက ငြင်းဆိုခဲ့ပါတယ်။ 

နိုဝင်ဘာ ၁၁ ရက်က  ဟူသီတပ်ဖွဲ့တွေဟာ ယီမင်ရှိ အမေရိကန်သံရုံးထဲကို ဝင်ရောက်ကာ သံရုံးဝန်ထမ်း အများအပြားနဲ့ ပိုင်ဆိုင်မှုတချို့ကို သိမ်းပိုက်ခဲ့တယ်ဆိုပြီး အမေရိကန် မီဒီယာပေါင်းစုံက သတင်းတွေတက်လာခဲ့ပါတယ်။

သောကြာနေ့က CMG သတင်းထောက် ရိုက်ကူးထားတဲ့ ရုပ်သံမှာ  အမေရိကန်သံရုံး ပတ်ဝန်းကျင်မှာ သိသာတဲ့ အပြောင်းအလဲ ထူးခြားမှုမရှိဘဲ ပုံမှန်အတိုင်း စည်းစနစ်တကျ သွားလာမှုကို မြင်တွေ့ရပါတယ်။

သံရုံးအနီးအနားမှာ ထူးထူးခြားခြား ဘာမှမမြင်ရ မကြားရသလို လွန်ခဲ့တဲ့ ရက်အတော်ကြာမှ မတွေ့ခဲ့ရဘူးလို့ ဒေသခံတချို့က ပြောပါတယ်။ 

ယီမင်နိုင်ငံဆိုင်ရာ အမေရိကန်သံတမန်တွေကို ၂၀၁၅ ခုနှစ် ဖေဖော်ဝါရီလမှာ မြို့တော်ဆာနား ကနေ ရွှေ့ပြောင်းခဲ့ပါတယ်။ 

ဒါပေမဲ့ ၂၀၁၄ ခုနှစ် စက်တင်ဘာလမှာ ဟူသီသူပုန်အဖွဲ့က မြို့တော်ကို သိမ်းပိုက်လိုက်ပြီးနောက် ပြည်တွင်းဝန်ထမ်း ၄၀၀ လောက် ထွက်ခွာသွားပါတယ်။ 

၂၀၁၈ ခုနှစ် ဖေဖော်ဝါရီလမှာတော့ အမေရိကန်ဟာ ပြည်တွင်းဝန်ထမ်း ၃၆၀ ကို တာဝန် ထမ်းဆောင်ခြင်းကနေ ဖျက်သိမ်းခဲ့ပါတယ်။ 

ဟူသီပြည်သူ့စစ်အဖွဲ့တွေဟာ နိုင်ငံတကာအသိအမှတ်ပြု သမ္မတ  မန်ဆူဟာဒီရဲ့အစိုးရကို မြို့တော်ဆာနာကနေ မောင်းထုတ်လိုက်ကတည်းက ယီမင်နိုင်ငံဟာ ၂၀၁၄ ခုနှစ် စက်တင်ဘာလကတည်းက ပြည်တွင်းစစ်ထဲ နစ်မြုပ်နေတာဖြစ်ပါတယ်။