တရုတ်နဲ့ အမေရိကန် နှစ်နိုင်ငံဟာ ဆက်ဆံရေး အားဖြည့်သင့်ပြီး ငြိမ်းချမ်းစွာ အတူယှဉ်တွဲ နေထိုင်သင့်တယ်လို့ တရုတ်သမ္မတ ရှီကျင့်ဖျင်က အမေရိကန်သမ္မတ ဂျိုးဘိုင်ဒင်ကို အစည်းအဝေးအတွင်း ပြောပါတယ်။

ကမ္ဘာ့အကြီးဆုံး စီးပွားရေးအင်အားကြီး နှစ်နိုင်ငံ ဖြစ်တဲ့အပြင် ကုလသမဂ္ဂ လုံခြုံရေးကောင်စီရဲ့ အမြဲတမ်း အဖွဲ့ဝင်နိုင်ငံတွေဖြစ်တဲ့ တရုတ်နဲ့ အမေရိကန်တို့ဟာ ပဋိပက္ခကို ရှောင်ဖို့ ကျန်တဲ့ တကမ္ဘာလုံးအပေါ် တာဝန်ရှိတယ်လို့ ရှီနဲ့ ဘိုင်ဒင်က သေသေချာချာ ပြောခဲ့တယ်လို့  တရုတ်အစိုးရ သတင်းဌာန စီစီတီဗီက နိုဝင်ဘာ ၁၆ ရက်မှာ ပြောပါတယ်။

ဘိုင်ဒင်ကို မိတ်ဆွေဟောင်းကြီးလို့ ရှီက ခေါ်လိုက်ပြီး သူတို့ရင်ဆိုင်နေရတဲ့ စိန်ခေါ်မှုတွေကို ဖြေရှင်းဖို့ ပူးပေါင်းဆောင်ရွက်မှုနဲ့ ဆက်ဆံရေး တိုးမြှင့်ရမယ်လို့လည်း ရှီက ပြောပါတယ်။

နှစ်နိုင်ငံဆက်ဆံရေးဟာ ပဋိပက္ခအသွင်ကို ပွင့်ပွင့်လင်းလင်း ရောက်မသွားတာ သေချာစေရမယ်လို့ ဘိုင်ဒင်က ရှီကို ပြောပါတယ်။

ကမ္ဘာ့အင်အားကြီး နှစ်နိုင်ငံ​ကြားက ဖြောင့်မှန်တဲ့ ဆွေးနွေးပွဲ စတင်ဖို့ လူ့အခွင့်အရေးနဲ့ လုံခြုံရေး ကိစ္စတွေကို ဆွေးနွေးဖို့ မျှော်လင့်တယ်လို့လည်း ဘိုင်ဒင်က ရှီကို ပြောပါတယ်။

တရုတ်နဲ့ အမေရိကန်တို့ဟာ ကိုဗစ်-၁၉ ကပ်ရောဂါ စတင်ရာ ရင်းမြစ်၊ ကုန်သွယ်ရေးနဲ့ ပြိုင်ဆိုင်မှုဆိုင်ရာ စည်းမျဉ်းတွေ၊ တရုတ်က နျူကလီးယားလက်နက်တိုက်ကို တိုးချဲ့တဲ့ ကိစ္စနဲ့ ထိုင်ဝမ်အပေါ် ဖိအားပိုတိုးလာတဲ့ ကိစ္စတွေအပေါ် သဘောမတူနိုင် ဖြစ်နေကြတယ်လို့ ရိုက်တာက ဖော်ပြထားပါတယ်။