ထိုင်းနိုင်ငံကို Test & Go အစီအစဉ်နဲ့ ဝင်ရောက်လာခဲ့ပြီး ကိုဗစ်-၁၉ ရောဂါပိုးစစ်ဆေးတွေ့ ရှိရသူ နိုင်ငံခြားသားခရီးသွား ၆ ယောက် ပျောက်ဆုံးနေတယ်လို့ နေးရှင်းသတင်းတပုဒ်မှာ ဖော်ပြပါတယ်။

Test & Go အစီအစဉ်အရ ထိုင်းနိုင်ငံတွင်း ဝင်ရောက်လာသူတွေအနေနဲ့ ကိုဗစ်-၁၉ ရောဂါပိုး ရှိ၊ မရှိ စစ်ဆေးခံရမှာ ဖြစ်ကာ သတ်မှတ်ဟိုတယ်မှာ တရက်နေထိုင်ပြီး ရောဂါပိုးမရှိမှသာ ဆက်လက်ပြီးတော့ သတ်မှတ်ထားတဲ့ ဒေသတွေဆီ လည်ပတ်နိုင်မှာ ဖြစ်ပါတယ်။

အဆိုပါ နိုင်ငံခြားသား ခရီးသွား ၆ ယောက်ကတော့ ကော့ချန်ဒေသတွင်း တည်းခိုရာ ဟိုတယ်တွေကနေ ပြီးခဲ့တဲ့ ဇန်နဝါရီ ၄ ရက်နေ့ကစတင်ကာ ပျောက်ဆုံးသွားခဲ့တာလို့ သတင်းမှာ ဖော်ပြပါတယ်။

“သူတို့ရဲ့ စစ်ဆေးချက်ရလဒ်တွေအရ ကိုဗစ်-၁၉ ရောဂါပိုး တွေ့ရပါတယ်။ ဒါပေမဲ့ သက်ဆိုင်ရာက သူတို့ကို ဇန်နဝါရီ ၅ ရက်နေ့ကတည်းက ဆက်သွယ်မရတော့တာ။ သူတို့ကျွန်းကနေ ထွက်သွားပြီလို့ ထင်ပါတယ်”လို့ ကော့ချန်ဒေသအုပ်ချုပ်ရေးမှူး ချန်ချိုင် ဖာချရာဝ ရန်ခွန်က ပြောပါတယ်။

ထွက်ပြေးသွားခဲ့တဲ့ နိုင်ငံခြားသားခရီးသွား ၆ ယောက်ထဲမှာတော့ ပြင်သစ်နိုင်ငံသား ၂ ယောက်၊ ပိုလန်နိုင်ငံသား ၂ ယောက်၊ နော်ဝေနဲ့ ဆွစ်ဇာလန်နိုင်ငံတွေက ၁ ယောက်စီ ပါဝင်နေပြီး လတ်တလောမှာတော့ ကော့ချန်ဒေသရဲစခန်းကို အကြောင်းကြားထားပြီးဖြစ်ကာ သူတို့ကို ဆက်လက်ရှာဖွေနေတယ်လို့ ဆိုပါတယ်။