ဆီနီဂေါတိုက်စစ်မှူးမာနေးဟာ အာဖရိကဖလားပြိုင်ပွဲကာလအတွင်း ဆေးရုံတက်ရောက်ခဲ့ရာမှာ အရေးပေါ်လူနာ တစ်ဦးရဲ့ဆေးရုံစရိတ်ကို ကူညီခဲ့ပါတယ်။ 

မာနေးဟာ ကိတ်ဗာဒီနဲ့ ရှုံးထွက်အဆင့်ပွဲစဉ်မှာ ပြိုင်ဘက်ဂိုးသမားနဲ့ ယှဉ်အလုမှာ ဦးခေါင်းဒဏ်ရာရခဲ့တာကြောင့် အိမ်ရှင်ကင်မရွန်းနိုင်ငံက ဆေးရုံမှာ သွားရောက်ကုသခဲ့ရတာပါ။ 

မာနေးဟာ ဆေးရုံတက်ခဲ့ရတဲ့ ခဏတာကာလအတွင်းမှာပဲ အသက်အန္တရာယ်ရှိတဲ့အထိ ထိခိုက်ဒဏ်ရာရခဲ့တဲ့ ကင်းမရွန်းလူနာကောင်လေးတစ်ဦးအတွက် ဆေးကုသစရိတ်လှူဒါန်းခဲ့တာပါ။ 

အဆိုပါလူနာဟာ ဆေးကုသစရိတ်အနေနဲ့ ဗဟိုအာဖရိက ငွေကြေး ဖရန့် ၄ သိန်းကုန်ကျခဲ့ပြီး စရိတ်မတက်နိုင်ခဲ့တာကြောင့် မာနေးက ကူညီလှူဒါန်းပေးခဲ့တာပါ။ 

မာနေးကူညီခဲ့တဲ့ လူနာကောင်လေးဟာ ဆိုင်ကယ်တိုက်မှုကြောင့် အရိုးကျိုးခဲ့ပြီး ခန္ဓာကိုယ်မှာလည်း ဒဏ်ရာအများအပြား ရခဲ့တာလို့ သိရပါတယ်။ 

မာနေးဟာ ဆေးရုံက ဆင်းပြီးနောက် အီကွယ်တိုရီယာဂွါနီယာနဲ့ ကွာတားဖိုင်နယ်ပွဲကို ဆက်လက်ကစားခဲ့ပြီး အနိုင်ရရှိခဲ့ပါတယ်။ 

အဲဒီနောက် ဆီမီးဖိုင်နယ်နဲ့ ဗိုလ်လုပွဲတွေမှာလည်း အနိုင်ရခဲ့ပြီး ဆီနီဂေါအသင်းကို ပထမဆုံး အကြိမ် အာဖရိက ချန်ပီယံဖြစ်အောင်ကူညီပေးနိုင်ခဲ့ပါတယ်။ 

လီဗာပူးတိုက်စစ်မှူး မာနေးဟာ သူ့ရဲ့မွေးရပ်မြေ ဆီနီဂေါမှာလည်း ဆေးရုံတွေနဲ့ စာသင်ကျောင်းတွေအတွက် လှူဒါန်းပေးမှုကြောင့် အများရဲ့ချီးကျူးမှုခံခဲ့ရပါတယ်။