ထိုင်းနိုင်ငံက အသက် ၅ နှစ်ကနေ ၁၁ နှစ်ကြား ကလေးတွေမှာ ကိုဗစ်-၁၉ ရောဂါ ကူးစက်မှုနှုန်း မြင့်တက်လာတာမို့ အစိုးရက ကာကွယ်ဆေးထိုးနှံမှုတွေ အရှိန်မြှင့်လုပ်ဆောင်နေရတယ်လို့ ကိုဗစ်-၁၉ ရောဂါအခြေအနေစီမံကြီးကြပ်ရေးစင်တာ (စီစီအက်စ်အေ)က ပြောပါတယ်။

စီစီအက်စ်အေရဲ့ ပြောရေးဆိုခွင့်ရသူ ဒေါက်တာ ထဝီဆစ်လ်ပ် ဗီဆနူရိုထင်က ပြီးခဲ့တဲ့ ၂၀၂၀ ပြည့်နှစ်၊ ဇန်နဝါရီကနေ နိုဝင်ဘာလအတွင်း အဆိုပါ အသက်အရွယ်ပိုင်းအလိုက် ကလေးတွေမှာ ကိုဗစ်-၁၉ ကူးစက်မှုနှုန်းဟာ ၁ ဒသမ ၄ ရာခိုင်နှုန်းရှိခဲ့ရာကနေ ဒီဇင်ဘာ ကနေ ပြီးခဲ့တဲ့ ၂၀၂၁ ခုနှစ်၊ မတ်လအတွင်း ၁ ရာခိုင်နှုန်းရှိခဲ့တယ်လို့ ဆိုပါတယ်။

အဲဒီနောက် ၂၀၂၁ ခုနှစ်၊ ဧပြီကနေ ဒီဇင်ဘာအတွင်း ၆ ဒသမ ၂ ရာခိုင်နှုန်းထိ မြင့်တက် လာခဲ့ကာ ပြီးခဲ့တဲ့ ဇန်နဝါရီ ၁ ရက်ကနေ ဖေဖော်ဝါရီ ၂ ရက်အတွင်းမှာတော့ ၆ ဒသမ ၆ ရာခိုင်နှုန်းထိ ထပ်ပြီးတော့ ရောဂါကူးစက်မှုနှုန်းတွေ မြင့်တက်နေခဲ့တာလို့ သူက ပြောပါ တယ်။

ဖေဖော်ဝါရီ ၂ ရက်အထိ ကိုဗစ်-၁၉ ရောဂါကူးစက်ခံခဲ့ရတဲ့ အသက် ၅ နှစ်ကနေ ၁၁ နှစ် ကြား ကလေးငယ်တွေအရေအတွက်ကတော့ ၁၃၇,၂၆၂ ယောက် ရှိလာခဲ့ပြီလို့ ဆိုပါတယ်။

လက်ရှိမှာတော့ ထိုင်းနိုင်ငံတဝန်း ကလေးငယ်တွေဆီ ရောဂါကူးစက်မှုရာခိုင်နှုန်းဟာ ဗီဇ ပြောင်း ဒယ်လ်တာနဲ့ အိုမီခရွန်ရောဂါကူးစက်ပျံ့ပွားမှုကြောင့် ပိုပြီးတော့ မြင့်တက်လာခဲ့ တာလို့ ဒေါက်တာ ထဝီဆစ်လ်ပ်က ပြောပါတယ်။

ဒါကြောင့်မို့ အဆိုပါ အသက်အရွယ်အပိုင်းအခြားအုပ်စုထဲက ကလေးတွေကို ကိုဗစ်-၁၉ ရောဂါ ကာကွယ်ဆေးထိုးနှံမှုတွေကို တိုးမြှင့်သွားရမယ်လို့ ပြောပါတယ်။

ထိုင်းနိုင်ငံတဝန်း အသက် ၅ နှစ်ကနေ ၁၁ နှစ် ကြား ကလေးငယ်တွေ ကာကွယ်ဆေးထိုးနှံ မှုကိုတော့ ပြီးခဲ့တဲ့ ဇန်နဝါရီ ၃၁ ရက်က စတင်ခဲ့တာဖြစ်ပြီး စာသင်ကျောင်းတွေမှာတော့ ဖေဖော်ဝါရီ ၇ ရက်မှာ စတင်ပြီးတော့ ထိုးနှံပေးနေတာ ဖြစ်ပါတယ်။

စီစီအက်စ်အေအနေနဲ့ ကလေးငယ်တွေကို Sinovac ကာကွယ်ဆေး ၂ ကြိမ်ထိုးနှံနိုင် ကြောင်း ခွင့်ပြုပေးခဲ့ပြီဖြစ်ပေမယ့်လည်း ကလေးငယ်တွေရဲ့ မိဘတွေကတော့ ကာကွယ်ဆေးထိုးနှံမှုနဲ့ ပတ်သက်ပြီး စိုးရိမ်ပူပန်မှုတွေ ရှိနေကြဆဲဖြစ်တယ်လို့ ဒေါက်တာ ထဝီဆစ်လ်ပ်က ပြောပါတယ်။