ကချင်ပြည်နယ် ပူတာအိုမြို့၊ ဖတ်မာရွာမှာ ဖေဖော်ဝါရီ ၁၅ ရက် ည ၈ နာရီ၀န်းကျင်လောက်က စစ်ကောင်စီတပ် လက်နက်ကြီးနဲ့ ရမ်းသမ်းပစ်ခတ်မှုကြောင့် လူငယ်လင်မယားနှစ်ဦး သေဆုံးသွားတယ်လို့ ရွာခံတစ်ဦးက ပြောပါတယ်။

“မနေ့ည ၈ နာရီလောက်မှာ စစ်ကောင်စီတပ်စွဲထားတဲ့နေရာကို KIA ၊ PDF ပူးပေါင်းတပ်ဖွဲ့က အလစ်ငိုက်တိုက်ခိုက်လို့ စစ်ကောင်စီဘက်က အထိနာသွားတယ်။ စစ်ကောင်စီဘက်ကတော့ ထုံးစံအတိုင်း လက်နက်ကြီးနဲ့ နေရာတစ်ကာကို ရမ်းသမ်းပစ်လို့ ရွာက လူငယ်လင်မယားနှစ်ဦး ထိပြီး ဆုံးသွားတယ်။”

ပူတာအိုပြည်သူ့ကာကွယ်ရေးတပ်ဖွဲ့ထဲက ရဲဘော်တစ်ဦးက "စစ်ကောင်စီတပ်ဖွဲ့‌ကို အလစ်တိုက်လိုက်တာပါ။ သူတို့နေတဲ့နေရာကို လက်နက်ကြီးနဲ့ပစ်လိုက်လို့ သူတို့ဘက်က အထိနာသွားတယ်။ ဘယ်လောက် ‌ထိခိုက်သေဆုံးတယ်ဆိုတာ မသိရသေးဘူး။ တိုက်ပွဲအ‌နေအထားက ပြောက်ကျားတိုက်ပွဲပဲဖြစ်ခဲ့တယ်။” လို့ ပြောပါတယ်။

ပူတာအိုမြို့နယ်ထဲက ဖတ်မာရွာခံ လူငယ်လင်မယားတို့ဟာ တိုက်ပွဲဖြစ်နေချိန် ဆိုင်ကယ်နဲ့ထွက်ပြေးရင်းက လက်နက်ကြီး ထိမှန်သေဆုံးရတာဖြစ်ပြီး အိမ်ထောင်သက်တမ်းလည်း တစ်နှစ်သာ ရှိသေးတယ်လို့ မိသားစုနဲ့နီးစပ်သူတစ်ဦးက ပြောပါတယ်။

ပူတာအိုခရိုင်မှာ ၂၀၂၂ခုနှစ်အတွင်း ကချင်လွတ်မြောက်ရေးတပ်မတော် (KIA)၊ ပြည်သူ့ကာကွယ်ရေးတပ် (PDF) ပူးပေါင်းအဖွဲ့တွေနဲ့ စစ်ကောင်စီတပ်တို့ တိုက်ပွဲပြင်းထန်နေပြီး စစ်ကောင်စီဘက်က ၄၀ ထက်မနည်း သေဆုံးခဲ့တာဖြစ်ပါတယ်။ 

ပူတာအိုစခန်းသိမ်းတိုက်ပွဲတွေကြောင့် ဒေသခံပြည်သူတွေလည်း ဘေးလွတ်ရာကို ထွက်ပြေးသိမ်းရှောင်နေရတာ ဖြစ်ပါတယ်။