အသက် ၉၅ နှစ်ရှိ ဗြိတိန်ဘုရင်မကြီး အဲလိဇဘက် ကိုဗစ်-၁၉ ရောဂါ ကူးစက်ခံထားရတယ်လို့ ဘာမင်ဂန်နန်းတော်က ဖေဖော်ဝါရီ ၂၀ ရက်မှာ ကြေညာပါတယ်။ 

ဒါပေမဲ့ ရောဂါလက္ခဏာမပြင်းထန်တာကြောင့် ပေါ့ပါးတဲ့တာဝန်တွေကို ဝင်ဆာနန်းတော်ကနေ ဆက်လက်လုပ်ဆောင်မယ်လို့လည်း ပြောပါတယ်။

နန်းတော်ရဲ့ကြေညာချက်မှာ ဘုရင်မကြီးက ဆေးကုသမှုခံယူထားပြီး ကုသမှု သင့်တော်တဲ့ လမ်းညွှန်မှု အားလုံးကို လိုက်နေတယ်လို့ ဖော်ပြပါတယ်။

ထီးနန်းဆက်ခံမယ့် အသက် ၇၃ နှစ်ရှိ ချားလ်မင်းသားက မကြာမီရက်ပိုင်းက ဘုရင်မကြီးနဲ့ တွေ့ဆုံခဲ့တယ်လို့ နန်းတော် အဝန်းအဝိုင်းက ပြောပါတယ်။ ချားလ်ဟာ ဒီလအစောပိုင်းမှာ ဒုတိယအကြိမ် ကိုရိုနာဗိုင်းရပ်စ် ကူးစက်ခံထားရသူပါ။

ကမ္ဘာမှာ နန်းသက်အရှည်ဆုံးနဲ့ အသက်ကြီးဆုံး ဘုရင်မကြီးက မနှစ်က အောက်တိုဘာလကလည်း နာမကျန်းလို့  ဆေးရုံမှာ တညတာ နေခဲ့ရပါတယ်။  ဘုရင်မကြီးရဲ့ နန်းစံသက် နှစ် ၇၀ ပြည့်ပွဲကို  အခုလ အစောပိုင်းမှာ ကျင်းပခဲ့ပါတယ်။