စပိန်ကာကွယ်ရေးဝန်ကြီး မစ္စမာဂရီတာရိုဘလ်စ်က ဘူလ်ဂေရီးယားနိုင်ငံမှာ တပ်စွဲထားတဲ့ စပိန်လေတပ် တပ်ဖွဲ့ဝင်တွေကို သွားရောက်တွေ့ဆုံပြီး ယူကရိန်းဟာ အချုပ်အခြာနယ်မြေအတွက် ကိုယ်ပိုင်ဆုံးဖြတ်ခွင့် ရှိတယ်လို့ ပြောခဲ့ပါတယ်။ 

နေတိုးအဖွဲ့ဝင်နိုင်ငံတွေက အရှေ့ဥရောပရှိ မိတ်ဖက်နိုင်ငံတွေကို ကာကွယ်ဖို့ တပ်တွေ အားဖြည့်ချထားနေချိန်မှာ စပိန် ယူရိုဖိုက်တာဂျက် လေးစင်းကလည်း ဒီလအစောပိုင်း ဘူလ်ဂေးရီးယားကို ရောက်ရှိခဲ့တာပါ။

မစ္စမာဂရီတာက ဒေသတွင်းတည်ငြိမ်ဖို့နဲ့ ငြိမ်းချမ်းရေးထိန်းသိမ်းဖို့ စပိန်တပ်တွေ ဘူလ်ဂေးရီးယားမှာ အားဖြည့်ချထားတာဖြစ်ကြောင်း၊ ဒါပေမဲ့ ရုရှားရဲ့ ယူကရိန်းအပေါ် ပြဿနာရှာနေမှုကို သံတမန်နည်းလမ်းနဲ့ အဖြေရှာမှုကသာ အကောင်းဆုံးဖြစ်ကြောင်း ပြောပါတယ်။

“ဘူလ်ဂေးရီးယား ဝေဟင်ကို အခုလို စောင့်ရှောက်ရတဲ့ ရည်ရွယ်ချက်က တခုတည်းပါ။ ဒေသတွင်း တည်ငြိမ်ဖို့ပါ။ နောက်ရည်ရွယ်ချက်က အခုလို တပ်တွေချထားပေးမှုကတဆင့် သံတမန်ရေးနည်းလမ်းနဲ့ ဆွေးနွေးမှုတွေ ဖြစ်ပေါ်လာစေဖို့ပါ” လို့ ပြောပါတယ်။