ကွင်းလယ်ဒိုင်လူကြီးကို ဂျူဗင်တပ်စ်အသင်းက စေလွှတ်လိုက်တဲ့သူလို့ ဝေဖန်ခဲ့တဲ့ ရိုးမားနည်းပြ မော်ရင်ဟိုဟာ ၃ ပွဲပယ်ပြစ်ဒဏ်ခံရဖို့ ရှိနေပါတယ်။ 

ပြီးခဲ့တဲ့ ဖေဖော်ဝါရီ ၁၉ ရက်နေ့က ၂ ဂိုးစီသရေကျခဲ့တဲ့ ဗီရိုနာနဲ့ စီးရီးအေပွဲစဉ်မှာ ပွဲပြီးခါနီး ဘောလုံးကို ကန်ထုတ်ခဲ့တဲ့ နည်းပြမော်ရင်ဟိုကို ဒိုင်လူကြီးက ထုတ်ပယ်ခဲ့ပါတယ်။ 

မော်ရင်ဟိုဟာ ထုတ်ပယ်မခံရခင်မှာ ဒိုင်လူကြီး ပီယာရက်တိုကို ဖုန်းပြောဆိုနေတဲ့ အမူအရာ လုပ်ပြခဲ့ပါတယ်။ 

ဒါ့အပြင် ကွင်းလယ်ဒိုင်ကို ဂျူဗင်တပ်စ်အသင်းက ရည်ရွယ်ချက်တစ်ခုနဲ့ စေလွှတ်လိုက်တာလားလို့လည်း မေးခွန်းထုတ်ခဲ့ပါတယ်။ ရိုးမားနဲ့ ဂျူဗင်တပ်စ်အသင်းတို့ဟာ  ချန်ပီယံလိဂ်ဝင်ခွင့်ရရှိဖို့ အပြိုင်အဆိုင်ဖြစ်နေတာပါ။ 

ဒိုင်လူကြီး ပီယာရက်တိုရဲ့ အစ်ကိုဖြစ်သူ အယ်ဘာတိုဟာ ဂျူဗင်တပ်စ်အသင်းမှာ အလုပ်လုပ်နေတာ ၈ နှစ်လောက် ရှိပြီလို့ Football Italia သတင်းမှာဖော်ပြပါတယ်။ 

ဒီအခြေအနေကို နည်းပြမော်ရင်ဟိုက သိရှိပုံပေါ်ပြီး ကွင်းလယ်ဒိုင်ရဲ့ဆုံးဖြတ်ချက်တွေကို ဒေါသထွက်ပြီး ဂျူဗင်တပ်စ်က ရည်ရွယ်ချက်နဲ့ လွှတ်လိုက်တာလားလို့ မေးခွန်းထုတ်သွားခဲ့တာပါ။ 

မော်ရင်ဟိုရဲ့ အဲဒီစွပ်စွဲချက်အပေါ် အရေးယူခံရဖို့ရှိပြီး ၃ ပွဲအထိ ပွဲပယ်ချမှတ်ခံရဖို့ ရှိနေပါတယ်။